एजेन्सी । चीनको पूर्वी सहर सुजूमा रहेको एउटा होटल भत्किँदा कम्तीमा १७ जनाको मृत्यु भएको छ ।
स्थानीय सञ्चारमाध्यमका अनुसार उक्त दुर्घटना भएको ३६ घण्टासम्म खोजतलास गर्दा उद्धारकर्मीहरूले भग्नावशेषमा पुरिएर रहेका २३ जनालाई फेला पारेका थिए जसमध्ये ६ जना जीवितै छन् ।
चीनको ग्लोबल टाइम्स पत्रिकाका अनुसार उक्त भवनका मालिकले भवनको संरचनामा नै फेरबदल गर्ने प्रयास गरेकाले उक्त दुर्घटना भएको हुनसक्ने प्रारम्भिक अनुसन्धानले देखाएको छ ।
स्थानीय समयानुसार सोमबार दिउँसो ३:३० बजेतिर उक्त सिजी काइयुआन होटल भत्किएको थियो । त्यसपछि उद्धारकार्यमा ६०० जनाभन्दा बढी उद्धारकर्मी खटिएका थिए ।
जियाङ्गशु प्रान्तीय सरकारले उक्त दुर्घटनाबारे एक टोलीले छानबिन गरिरहेको र घटनासँग “सम्बन्धित व्यक्तिहरूले” फौजदारी अभियोगको सामना गर्नुपर्ने बताएको छ।
