एजेन्सी, १८ चैत । सन् २०२२ मा हुने विश्वकप फुटबलको युरोपेली क्षेत्रको छनौट अन्तर्गत मंगलबार राति भएको खेलमा बेल्जियमले शानदार जित दर्ता गरेको छ ।
विश्व बरियतामा पहिलो नम्बरमा रहेको बेल्जियमले घरेलु मैदानमा भएको खेलमा बेलारुसलाई ८–० गोल अन्तरल पराजित गरेको हो । पहिलो हाफमा चार गोल गरेको बेल्जियमले दोस्रो हाफमा थप चार गोल गर्न सफल रह्यो ।
बेल्जियमका लागि वानाकेनले १७ र ८९ औँ मिनेट, ट्रोसार्ड ३८ र ७५ औँ मिनेटमा दुई÷दुई गोल गरे भने बात्शुयी, डूकु, प्राएत र बेन्टेकले एक÷एक गोल गरेका हुन् ।
अहिलेसम्म खेलेका तीन मध्ये दुई खेलमा जित निकालेको बेल्जियम ७ अंकसहित समूह ई को शीर्ष स्थानमा छ ।
यसैबीच समूह एच अन्तर्गत मंगलबार राति भएका खेलमा स्लोभाकियाले रुसलाई २–१, क्रोएसियाले माल्टालाई ३–० तथा साइप्रसले स्लोभेनियालाई १–० ले पराजित गरेका छन् ।
