दाङ, ३ पुस । दाङमा ट्याक्टरको ठक्करबाट एकजना विद्यार्थीको मृत्यु भएपछि विद्यार्थीहरु त्यसको विरोध गर्दै मा सडकमा उत्रिएका छन् ।
तुलसी आवासिय माध्यामिक विद्यालयमा कक्षा ८ मा अध्ययनरत १३ वर्षिया बिजिता केसीको ट्याक्टरको ठक्करबाट मृत्यु भएपछि विद्यार्थीहरुले सडकमा टायर बालेर तुलसीपुर सल्यान सडक खण्ड अवरुद्ध पारेका छन् ।
विद्यार्थीहरुले दोषी माथी कारवाही र पिडितलाई न्यायको माग गदै विरोध प्रर्दशन गरेका छन् । उनीहरुले गोदामघर, विरेन्द्रचोक र बिपि चोकमा टायर बालेर सडक अवरुद्ध पारेका छन् ।
रा १ त १४३५ नम्वरको ट्याक्टरले गोदामघर नजिकै बिजितालाई ठक्कर दिएको प्रहरीले जनाएको छ । सोहि ट्याक्टरको ठक्करबाट अर्की एक विद्यार्थी पनि घाईते भएकी छिन् । उनको राप्ती प्रादेशिक अस्पताल तुलसीपुरमा उपचार भैरहेको छ ।
