काठमाडौं, १ कात्तिक । शिक्षा, विज्ञान तथा प्रविधिमन्त्री गिरिराजमणि पोखरेलले विश्वविद्यालय पदाधिकारी नियुक्तिमा राजनीतिक भागवण्डा नगरिने बताउनु भएको छ ।
शुक्रबार नेपाल पब्लिक क्याम्पस संघले राजधानीमा आयोजना गरेको एक कार्यक्रममा मन्त्री पोखरेलले सरकारको लक्ष्य अनुसार विश्वविद्यालय सुधारको प्रक्रियालाई सहयोग पुग्ने गरी दक्ष ब्यक्तिलाई पदाधिकारीमा चयन गरिने उल्लेख गर्नुभयो । उहाँले २०६२-६३ को जनआन्दोलनपछि विश्वविद्यालय पदाधिकारी नियुक्तिमा राजनीतिक भागवण्डा गर्ने चलन बसेको भन्दै अब सरकारले भागवण्डाको संस्कृतिलाई अघि नबढाउने दाबी गर्नुभयो ।
मन्त्री पोखरेलले शिक्षालाई संविधानले निर्देश गरेको बाटो भन्दा बाहिर नलग्ने पनि प्रतिवद्धता जनाउनुभयो । उहाँले सरकारले अपनाउने शिक्षा नीतिका बारेमा भ्रममा नपर्न प्रतिपक्षी दल नेपाली कांग्रेसलाई आग्रह गर्नुभयो ।
