नुवाकोट, २४ भदौ । नुवाकोटको शिवपुरीमा यात्रुबस दुर्घटना हुँदा सातजनाको मृत्यु भएको छ भने २४ जना घाइते भएका छन्। सदरमुकाम विदुरदेखि ४५ किलोमिटर पूर्वमा रहेको शिवपुरी गाउँपालिका वडा नम्बर ७ थानाभन्न्याङमा शनिबार मध्याह्नमा यात्रुबस दुर्घटना भएको हो।
दुर्घटनामा तीन महिलासहित चार जनाको घटनास्थलमै मृत्यु भएको जिल्ला प्रहरी कार्यालय नुवाकोटले जनाएको छ । अन्य तीनजनाको उपचारका क्रममा निधन भएको हो।
बिहान साढे ११ बजे काठमाडौंबाट गुर्जेभन्ज्याङ हुँदै खरानीटार जाँदै गरेको बा. १ ख ६३४८ नम्बरको बस सडकबाट एक सय मिटर तल खसेको जिल्ला प्रहरी प्रमुख प्रहरी उपरीक्षक वीरेन्द्रकुमार वस्यालले जानकारी दिनुभयो। २५ जना घाइतेको काठमाडौंको ग्रान्डी, ग्रिनसिटी र बि एन्ड बि अस्पतालमा उपचार भइरहेको छ।
