काठमाडौं, २१ फागुन । शहीद स्मारक बी डिभिजन लिगको उपाधि रानीपोखरी कर्नर टिम (आरसीटी) ले जितेको छ । मंगलवार भएको सुपर लिगको अन्तिम खेलमा श्री भगवती क्लबलाई १–० गोल अन्तरले पराजित गर्दै रानीपोखरीले उपाधि हात पारेको हो । तर जितपछि पनि टिम ए डिभिजनमा भने उक्लन पाएन ।
सातदोबाटोस्थित एन्फा कम्प्लेक्समा भएको खेलमा रानीपोखरीको जितमा लोकेन्द्र बहादुर कार्कीको एकमात्र गोल निर्णायक बन्यो । उनले खेलको २५ औं मिनेटमा उनम बुढाथोकीको पासमा हेडर गोल गरेका थिए । त्यसपछि श्री भगवती खेलमा फर्कन सकेन र आरसीटीले उपाधि जित्यो ।
उपाधिसंगै आरसीटीले ८ लाख र उपविजेता श्री भगवतीले ५ लाख हात पारे । बी डिभिजन च्याम्पियन भएपनि आरसीटी एन्फाको नयाँ नियम अनुसार ए डिभिजनमा बढुवा हुन पाएन ।
