शम्भू माली
कपिलवस्तु, १८ पुस । पछिल्लो समयमा कपिलवस्तुस्थित जगदीशपुर ताल आसपासमा चराको चोरी शिकारी बढ्दो क्रममा देखिएको छ । शिकारीहरुले रातको मौका पारी चराहरु मार्ने गरेको स्थानीयहरुको भनाई छ ।
कपिलवस्तुको जगदीशपुर तालमा विशेषगरी स्वदेश तथा विदेशी पर्यटकहरु चरा चुरुङ्गी हेर्नका लागि पुग्ने गर्दछन् । तर, पछिल्लो समयमा ताल आसपासमा वढ्दो चोरी शिकारीले चराहरुनै लोप हुन अवस्था पुगेको स्थानीयहरुको भनाई छ ।
तालमा डुंगा चलाउने काम गदै आएका मोहनलाल राजभरले केही समय यता मात्र विषादी खाएर मडुल र सिंह जातका २१ चरा मारेको बताए ।
१ सय ५७ हेक्टरमा फैलिएको यो ताल कृत्रिम रुपमा बनाईएको नेपालकै सबैभन्दा ठूलो ताल हो । तालको प्रवद्र्धन र विस्तारका लागि बढ्दो चोरी शिकारीलाई रोक्न स्थानीय प्रशासनले विशेष पहल गर्नूपर्ने स्थानीयको भनाई छ ।
सदरमुकाम तौलिहवादेखि करीब ११ किमी उत्तर कपिलवस्तु नगरपालिका –९ मा पर्ने यो ताल सिमसारमा आश्रित ६१ र अन्य ५७ प्रजातिका चराहरु पाइन्छन् । त्यस्तै, विश्वमै दुर्लभ मानिएका ७ प्रजातिका चराहरु पनि यहाँ पाईन्छ ।
अझ, यो मौसममा साईबेरिया, रुश, चीन, मंगोलिया, मध्य एशियाका लगायतका देशबाट चिसो छल्न यहाँ चराहरु आउने गर्दछन् । तर, यसरी वढ्दो चोरी शिकारी रोक्न सकिएन भने चरा अध्ययन अनुसन्धानका लागि जगदिशपुर ताल पूग्नेहरु पनि रित्तो हात फर्किेन्छन् भने तालको महत्वपनि घट्ने सरोकारवालाहरु बताउँछन् ।
