तेजना पण्डित
काठमाडौं, २८ मंसिर । नेपाल कम्युनिष्ट पार्टी (नेकपा)को स्थायी कमिटी बैठक शनिवार बस्दैछ । लामो समयपछि बस्न लागेको सत्तारुढ दल नेकपाको स्थायी कमिटी बैठकलाई निकै महत्वपुर्ण रुपमा हेरिएको छ ।
सत्तारुढ दल नेकपा गठन भएपछि तेश्रो पटक स्थायी समिति बैठक बस्न लागेको हो । बैठकको ऐजेण्डा सार्वजनिक गरिएको छैन । तर बैठक महत्वपुर्ण हुने आंकलन गरिएको छ । सरकार र पार्टीबीच सुमधुर सम्बन्ध नभएको जस्तो देखिएको बेला दल भित्रैका केही नेताहरुले स्थायी समिति बैठकमा सरकारको समीक्षा गर्नु पर्ने बताउँदै आएका छन् ।
प्रधानमन्त्री निवास बालुुवाटारमा मंसिर २२ गते बसेको नेकपाको सचिवालय बैठकले शनिबारका लागि स्थायी कमिटीको बैठक बस्ने मिती तय गरेको थियो । नेकपाको कुनै पनि कमिटी गठन गर्दा र अन्य महत्वपूर्ण निर्णय गर्दा नेकपाको सचिवालयले तयार पारेको प्रस्ताव स्थायी कमिटीले अनुमोदन गर्नुपर्ने पार्टीको बिधानमा व्यवस्था छ ।
विधानमा यस्तो व्यवस्था भए पनि व्यवहारमा यो कार्यान्वयनमा आउन नसकेको पार्टीकै एकथरी नेताहरुले सार्वजनिक रुपमै बताउंदै आएका छन् । पार्टी भित्रको मतभेद स्वभाविक भए पनि यसको असर स्थायी समितिमा देखिन नहुने बुद्धिजीवीहरुको भनाई छ ।
पार्टी एकता भएको छ महिनामासम्म दुई पटक मात्र स्थायी कमिटी बैठक बस्न सकेको छ । त्यो पनि बल्लतल्ल छोटो समयका लागि मात्र । पटक पटक स्थायी कमिटी बैठक बोलाईए पनी स्थगित हुँदै आईरहेको बेला तेश्रो बैठक शनिबार बस्दैछ ।
सरकार संचालन गरेको दश महिना बितिसक्यो तरपनी सरकारले राम्रो काम गर्न नसकेको आम जनताको गुनासो छ । पार्टी भित्रै पनि यो गुनासो बढिरहेको छ । स्थायी कमिटी बैठकले यसलाई बुझेर सरकारलाई दिशा निर्देशन गर्ने वातावरण बनाउने विश्वास बुद्धिजिवी भरत पहाडीको छ ।
नेकपाको ४७ सदस्यीय स्थायी समिती छ । मुलुकलाई नेतृत्व गर्ने राजनीतिक नेताहरु आत्म केन्द्रित नभई सामाजिक हुनु पर्ने सुझाव बुद्धिजीवीहरुको छ ।
