काठमाडौं, १८ असोज । संसदीय समितिले नेपाल दुर संचार प्राधिकरणको अध्यक्षमा दिगम्बर झाको पुनर्नियुक्तीको यथार्थ विवरण १५ दिन भित्र समितिमा पेश गर्न सरकारलाई निर्देशन दिएको छ ।
संघीय संसदको विकास तथा प्रविधि समितिको बिहिबार बसेको बैठकले विवादमा तानिएका झालाई प्राधिकरणको अध्यक्षमा पुनर्नियुक्तीको आधार र कारणको यथार्थ विवरण १५ दिन भित्र समितिमा पेश गर्न संचार तथा सूचना प्रविधि मन्त्रालयलाई निर्देशन दिएको हो ।
बैठकमा संचार तथा सूचना प्रविधि मन्त्री गोकुल बास्कोटाले नेपाल टेलिकमको गुणस्तरीय सेवा वृद्धि गर्न टावर निर्माणको कामलाई उच्च प्राथमिकता दिइएको बताए ।
समितिका सदस्य गणेशकुमार पहाडीले नेपाल टेलिकमको सेवाले निजी क्षेत्रसँग प्रतिस्पर्धी गर्न नसक्नुको कारणबारे मन्त्री बास्कोटाको ध्यानाकर्षण गराए ।
समितिका अर्का सदस्य महेन्द्रराय यादवले एनसेललाई राजस्व छली गर्न नदिन मन्त्रालयले प्रभावकारी कदम चाल्न नसकेको भन्दै सरकारको आलोचना गरे ।
समितिका सदस्यहरुले नीति तथा कार्यक्रममा उल्लेख गरिएको कार्यक्रम समेत सरकारले संचालन गर्न नसकेको भन्दै आपत्ति जनाएका थिए ।
