काठमाडौँ, १६ भदौ । नेपाललाई एसिया कप छनोटको प्रमुख दाबेदारका रूपमा हेरिएको थियो । मलेसियामा पहिलो दुई खेलपछि स्थिति अनुमान गरिए अनुरूपको ठीकविपरीत भइसकेको छ ।
दुवै खेल हारेपछि नेपालको फाइनल दौड कमजोर बनिसकेको छ । नेपालका सामु अब एउटै विकल्प मात्र बाँकी छ, राउन्ड रोबिनमा बाँकी रहेको सबै ३ खेल जित्ने । यति पनि नेपाललाई फाइनल पुर्याउन अपर्याप्त हुन सक्छ । ओमानसँगको अप्रत्याशित हार र अर्को दाबेदार यूएईसँगको पराजयपछि नेपालको हातमा फाइनल यात्रा छैन । ६ राष्ट्र सम्मिलित प्रतियोगिताको फाइनल पुग्न नेपालले अरू टोलीको नतिजामा भर पर्नुपर्ने हुन्छ ।
यूएई र ओमान दुवैले पहिलो दुई खेल जितेका छन् । यी दुवैले कम्तीमा दुई खेल हारेको खण्डमा र नेपालले तीनै खेलमा राम्रो जित हात पारेमा मात्र फाइनल पुग्ने सम्भावना रहन्छ । यूएई र ओमानले एक आपसमा तथा हङकङसँग खेल्न बाँकी छ । नेपालले शनिबार मलेसियासँग खेल्नेछ । त्यसपछिको बाँकी दुई खेल सिंगापुर र हङकङसँग खेल्नेछ ।
२०१३ को विश्व क्रिकेट लिग डिभिजन ३ को सम्झना नेपाली टोलीलाई मलेसियामा एसिया कप छनोटमा जोस भर्न मद्दत गर्न सक्छ । नेपाली क्रिकेटले यसलाई ‘द मिराकल अफ बर्मुडा’ भनेर पनि सम्झने गर्छ । अर्थात बर्मुडाको जादुमय यात्रा ।
नेपाल ५ वर्षअघि डिभिजन ३ खेल्न बर्मुडा गएको थियो । ठीक अहिले जस्तै नेपाललाई त्यतिखेर पनि दाबेदारमा राखिएको थियो । नेपाल पहिलो दुई खेलमा अमेरिका र युगान्डासँग पराजित भएको थियो ।
समान हैसियतको अमेरिकासँगको पराजय सामान्य भए पनि युगान्डासँगको पराजय नेपालका लागि निकै अप्रत्याशित थियो । मुख्य भनेको नेपाललाई युगान्डासँगको हारले रेलिगेसनतर्फ धकेलिदिएको थियो । एउटा अर्को हारले नेपाललाई रेलिगेसनमा परी डिभिजन ४ मा धकेल्न सक्थ्यो ।
नेपालको असली खेल त्यसपछि सुरु भयो । बर्मुडा, ओमान र इटालीमाथि नेपालले जित हात पार्यो । बर्मुडा र इटालीमाथिको ठूलो जितले पनि नेपालको फाइनल यात्रा निश्चित भएन । यस्तैमा युगान्डाले अमेरिकामाथि जित हात पार्दा नेपाल फाइनलमै पुग्यो । फाइनलमा युगान्डालाई पराजित गर्दै नेपालले उपाधि हात पार्यो ।
आयोजक मलेसिया र सिंगापुर नेपालका लागि धेरै ठूला प्रतिद्वन्द्वी होइनन् । यी दुई टोलीमाथि नेपालले निरन्तर जित हात पार्दै आएको छ । तर नेपालले मलेसियामा वान–डे अन्तर्राष्ट्रिय मान्यताप्राप्त राष्ट्रअनुरूपको प्रदर्शन देखाउन सकिरहेको छैन । त्यसैले मलेसिया र सिंगापुरसँगको खेलमा आफ्नो वास्तविक लय समाउँदै हङकङसँग खेल अगाडि निखारिएर बस्नु नेपालका लागि उत्तम हुन्छ ।
यो खबर आजको कान्तिपुर दैनिकमा प्रकाशित छ ।
