साउन २७ , काठमाण्डौँ । अमेरिकी राष्ट्रपति डोनाल्ड ट्रम्पले आफ्नो मुलुकमाथि आक्रमण गरे उत्तर कोरियाले नराम्रोसँग पछुताउनुपर्ने चेतावनी दिनुभएको छ ।

ट्रम्पले उत्तर कोरियाले अहिले जारी राखेको हर्कत नरोके ठूलो मूल्य चुकाउनुपर्ने चेतावनी पनि दिनुभयो । अहिलेसम्म कमै राष्ट्रले भोगेको दुर्दशा उत्तर कोरियाले भोग्नुपर्ने ट्रम्पको भनाइ छ । उत्तर कोरियाले अमेरिकी क्षेत्र गुआममा चार वटा मिसाइल हान्ने चेतावनी दिएपछि ट्रम्पको यो प्रतिक्रिया आएको हो । ट्रम्पको चेतावनीलाई उत्तर कोरियाले भने बकवास भन्दै आएको छ ।

उत्तर कोरियाले गत जुलाइमा अन्तरमहादेशीय मिसाइल परीक्षण गरेपछि अमेरिका र उत्तर कोरियाबीच तनाव बढ्दै गएको छ । ट्रम्पले उत्तर कोरियासँग वार्ता गर्न अमेरिका सधैं तयार रहेको पनि बताउनुभयो ।