काठमाडौं, १८ चैत । नेपालमा सम्पन्न प्रतिनिधिसभा र प्रदेशसभाको निर्वाचनप्रति प्रश्न चिन्ह खडा गर्दै युरोपेली युनियन (ईयू)ले सार्वजनिक गरेको निर्वाचन प्रतिवेदनप्रति सत्तारुढ दल नेकपा माओवादी केन्द्र मौन देखिएको छ ।
जब कि यसको सर्वत्र विरोध भइरहेको छ । प्रधानमन्त्री केपी शर्मा ओलीले सार्वजनिक कार्यक्रमबाट नै उक्त प्रतिवेदनमाथि आपत्ति जनाउँदै त्यसलाई सच्याउन आग्रह गरेका थिए । प्रतिपक्षी दल नेपाली कांग्रेसले पनि विज्ञप्तिमार्फत उक्त प्रतिवेदन सच्याउन आग्रह गरेको छ । प्रतिवेदनले नेपालको संविधानका प्रावधानका लागि ठाडो चुनौती दिएको उल्लेख गरेको छ ।
धेरै नागरिक पक्षले समेत यसको विरोध गरिरहेका छन् । यतिसम्म कि सर्वसाधारण जनताले समेत ईयूको नेपाल र नेपालीलाई होच्याउने व्यवहारलाई मन पराएका छैनन् । तर माओवादी केन्द्रले भने औपचारिक या अनौपचारिक रुपमा अहिलेसम्म यसको कुनै विरोध गरेको छैन । माओवादी केन्द्रका नेताहरुले पनि ईयूको प्रतिवेदनबारे सार्वजनिक अभिव्यक्ति दिएका छैनन् । यसलाई राष्ट्रवादी नेपालीले आश्चर्यका रुपमा लिएको पाइएको छ । आजको नेपाल समाचारपत्रको पहिलो पृष्ठमा यो समाचार छापिएको छ ।
