काठमाडौं, २७ फागुन । राष्ट्रिय जनता पार्टी नेपालले प्रधानमन्त्री केपी शर्मा ओलीलाई विश्वासको मत दिएको छ । पार्टीका सांसद महेन्द्र राय यादवले प्रधानमन्त्री ओलीलाई विश्वासको मत दिने बताएका छन् । आईतबार प्रधानमन्त्रीलाई विश्वासको मत दिन बसेको प्रतिनिधिसभा बैठककमा बोल्दै उनले यथास्थितिमा सरकारमा भने नजाने बताए ।
सांसद यादवले संविधान संशोधन गर्ने आफूहरुको माग सम्बोधन गरे सरकारमा सहभागी हुन सक्ने पार्टीको धारणा रहेको बताए । उनले सर्वदलीय बैठक बोलाएर मुलुकलाई अघि बढाउने साझा एजेन्डा तय गर्न पनि प्रधानमन्त्री ओलीलाई सुझाव दिए ।
सांसद यादवले वाम गठबन्धनले प्रदेश २ मा सरकारसँग सहकार्य गरेकाले आफूहरुले पनि प्रधानमन्त्री ओलीलाई विश्वासको मत दिने निर्णय गरेको स्पष्ट पारे । उनले सिंगो देशलाई एक ढिक्का बनाएर लैजान पनि प्रधानमन्त्री ओलीसँग आग्रह गरे ।
