नेपाल टस जितेर ब्याटिङ गर्दै
काठमाडौं, २६ फागुन । आईसीसी एकदिवसीय विश्वकप छनोटमा नेपालले आफ्नो तेस्रो खेलमा आज अफगानिस्तानसँग प्रतिस्पर्धा गरिरहेको छ ।
जिम्बावेको बुलावायो मैदानमा जारी खेलमा नेपालले टस जितेर ब्याटिङ गरिरहेको छ । नेपालले यस मैदानमा पहिलोपटक खेल्न लागेको हो । शुरुवाती २ खेलमा पराजय भोगेको नेपाल सुपर सिक्समा स्थान बनाउन आजको खेल जित्नै पर्ने दबाबमा छ ।
तीन खेलमा पराजय बेहोरेको अफगानिस्तानले पनि हालसम्म प्रतियोगितामा अंक जोड्न सकेको छैन । तर, नेट रनरेटको आधारमा अफगानिस्थान नेपालभन्दा एक स्थान माथि छ । नेपाल रहेको समूह बी बाट स्कटल्याण्डले सुपरसिक्समा स्थान पक्का गरिसकेको छ ।
बाँकी २ स्थानमा जिम्बाब्वे, नेपाल, हङकङ र अफगानिस्तान सबैको सम्भावना कायमै छ । जिम्बाब्वेले २ खेल जितिसकेको अवस्थामा उसको सम्भावना सबैभन्दा बढी छ । हङकङले पनि १ खेल जितेको छ ।
प्रतियोगिताबाट नेपालले आगामी ४ वर्षका लागि एकदिवसीय मान्यता पक्का गर्ने लक्ष्य राखेको छ । त्यसका लागि आजको खेलमा अफगानिस्तान र सोमबार हङकङलाई हराउनुपर्ने हुन्छ ।