जलवायु वित्त बढाउन विकसित देशलाई राष्ट्रसंघ प्रमुख गुटेरेसको आग्रह

संयुक्त राष्ट्रसंघका महासचिव एन्टोनियो गुटेरेसले जलवायु परिवर्तनको असर न्युनिककरण तथा त्यसबाट प्रभावित देशलाई सहयोग गर्न विकसित राष्ट्रहरूले जलवायु वित्त बढाउनुपर्ने बताएका छन् । शुक्रवार टर्कीको तटीय शहर अन्टाल्यामा जारी संयुक्त राष्ट्रसंघीय जलवायु परिवर्तनसम्बन्धी ३१ औँ सम्मेलन (कोप–३१) मा आयोजित पत्रकार सम्मेलनमा बोल्दै महासचिव गुटेरेसले विश्वव्यापी जलवायु वित्त प्रणालीमा संरचनागत अन्याय रहेको उल्लेख गरे । जलवायु परिवर्तनको जोखिममा रहेका विकासशील राष्ट्रहरूले आवश्यकताअनुसार आर्थिक सहयोग प्राप्त गर्न नसकेको उनको भनाइ छ । गुटेरेसले विशेषगरी जलवायु परिवर्तनको उच्च जोखिममा रहेका विकासशील देशलाई अनुकूलनका कार्यक्रम सञ्चालन गर्न तथा जलवायुजन्य क्षति र नोक्सानीको सामना गर्न ठूलो आर्थिक सहयोग आवश्यक रहेको बताए । उनले अनुकूलनका लागि उपलब्ध जलवायु वित्त तीन गुणाले बढाइए पनि त्यसले आवश्यक कुल रकमको ३० प्रतिशतभन्दा कम मात्रै पूरा गर्ने अवस्था रहेको स्पष्ट पारे । विकसित राष्ट्रहरूले गरेका आर्थिक सहयोगका प्रतिबद्धता वास्तविक आवश्यकताभन्दा निकै कम रहेको उनको भनाइ छ । बढी प्रदूषण गर्ने राष्ट्रहरूले जलवायु परिवर्तनबाट प्रभावित देशको आवश्यकता सम्बोधन गर्न आवश्यक स्रोत जुटाउने वातावरणसमेत तयार गर्न नसकेको उनले टिप्पणी गरे । महासचिव गुटेरेसले नयाँ आर्थिक स्रोत परिचालनसँगै अहिले उपलब्ध वित्तीय स्रोतको प्रभावकारी उपयोग गर्नुपर्नेमा पनि जोड दिए। जलवायु परिवर्तनविरुद्धका कार्यक्रम विस्तार गर्न विद्यमान स्रोतको उचित व्यवस्थापन र परिचालन आवश्यक रहेको उनले बताए । कोप–३१ सम्मेलनमा जलवायु वित्तको विषय प्रमुख छलफलका मुद्दामध्ये एक बनेको छ । विशेषगरी विकासशील तथा जलवायु परिवर्तनको उच्च जोखिममा रहेका देशहरूले जलवायुजन्य विपद्का असर सम्बोधन गर्न, अनुकूलन क्षमता वृद्धि गर्न र प्रभावित समुदायको पुनःस्थापनाका लागि विकसित राष्ट्रबाट थप आर्थिक सहयोगको माग गर्दै आएका छन् । जलवायु परिवर्तनमा विकसित राष्ट्रहरूको ऐतिहासिक योगदान र विकासशील देशहरूले भोगिरहेको क्षतिबीचको असमानतालाई सम्बोधन गर्नुपर्ने विषय पनि सम्मेलनमा उठिरहेको छ ।