पूर्वी चीनको जियाङ्सीमा पहिरोः एकको मृत्यु, ११ जना बेपत्ता

पूर्वी चीनको जियाङ्सी प्रान्तस्थित जियान सहरको सुइचुआन काउन्टीमा शनिवार बिहान गएको पहिरोमा परी एक जनाको मृत्यु भएको छ भने ११ जना अझै बेपत्ता भएका छन् । स्थानीय अधिकारीहरूकाअनुसार शनिवार बिहान करिव ४ बजेतिर एक गाउँमा उक्त प्राकृतिक विपद् आएको हो । काउन्टीको बाढी नियन्त्रण तथा खडेरी राहत मुख्यालयकाअनुसार ‘साउदेल’ आँधीका कारण केही दिनदेखि जारी मुसलधारे वर्षाले यो पहिरो निम्त्याएको हो । पहिरोमा परेका दुई जनालाई जीवितै उद्धार गरिएको छ र उनीहरूको स्वास्थ्य अवस्था स्थिर रहेको जानकारी दिइएको छ । उद्धार कार्यका लागि शनिबार रातिसम्म ६४० भन्दा बढी उद्धारकर्मीहरू घटनास्थलमा खटिएका छन् । गाउँ जोड्ने सडक क्षतिग्रस्त भएका कारण अग्नि नियन्त्रक र उद्धार टोलीहरू पहाडको वैकल्पिक बाटो हुँदै शनिवार बिहान ११ बजे घटनास्थल पुगेका थिए। उद्धार कार्यमा लाइफ डिटेक्टर (जीवन पहिचान गर्ने उपकरण), ड्रोन र तालिमप्राप्त कुकुरहरूको प्रयोग गरिएको छ । हालसम्म ३९ जना गाउँलेहरूलाई सुरक्षित स्थानमा सारिएको छ भने सम्भावित जोखिमलाई मध्यनजर गर्दै छिमेकी क्षेत्रका ५ हजार ३ सय भन्दा बढी बासिन्दाहरूलाई स्थानान्तरण गरिएको छ । अवरुद्ध सडक र विद्युत सेवा पुनःसञ्चालनका लागि प्राविधिकहरू खटिएका छन् भने दूरसञ्चार सेवा सुचारु भइसकेको छ ।
यस विपद्का कारण जियाङ्सी प्रान्तका करिब १ लाख ६१ हजार ५ सय बासिन्दा प्रभावित भएका छन् । स्थितिको गम्भीरतालाई ध्यानमा राख्दै जियाङ्सी प्रान्तीय समितिले शनिवार दिउँसो तेस्रो तहको आपतकालीन प्रतिक्रिया जारी गरेको छ । यस्तै, चीनको प्राकृतिक स्रोत मन्त्रालय र आपतकालीन व्यवस्थापन मन्त्रालयले पनि राष्ट्रिय स्तरको आपतकालीन कार्य टोलीहरू घटनास्थलमा परिचालन गरेका छन् ।
चीनको राष्ट्रिय विकास तथा सुधार आयोगले जियाङ्सीको उद्धार र राहत कार्यका लागि केन्द्रिय कोषबाट २० मिलियन युआन (करिव २९.५ लाख अमेरिकी डलर) विनियोजन गरेको छ । यो रकम क्षतिग्रस्त सडक, खानेपानी, विद्यालय र अस्पताल जस्ता पूर्वाधारहरूको पुनर्निर्माणमा खर्च गरिनेछ ताकि प्रभावित क्षेत्रको जनजीवन छिट्टै सामान्य अवस्थामा फर्कन सकोस् ।
चीनमा चार–तहको आपतकालीन प्रतिक्रिया प्रणाली रहेको छ, जसमा पहिलो तह सबैभन्दा गम्भीर मानिन्छ ।