काठमाडौं, १० फागुन । एमाले र माओवादी केन्द्रले मन्त्रालय भागबन्डा गरेका छन् । भागबन्डाअनुसार एमालेले प्रधानमन्त्रीसहित ११ मन्त्रालय राख्ने भएको छ । माओवादी केन्द्रले भने ७ मन्त्रालय पाउने सहमति भएको छ ।
प्रधानमन्त्री केपी शर्मा ओली र माओवादी केन्द्रका अध्यक्ष पुष्पकमल दाहालबीच बिहीबार बालुवाटारमा भएको वार्ताले मन्त्रालय भागबण्डा टुंग्याएका हुन् । एमालेले अर्थ, परराष्ट्र, भौतिक पूर्वाधार, सञ्चार, संघीय मामिला तथा सामान्य प्रशासनसहित १० मन्त्रालय राखेको छ ।
माओवादीले गृह र उर्जासहित ७ मन्त्रालय पाएको छ । माओवादीले भौतिक पूर्वाधार र पर्यटन मागेको थियो । एमाले महासचिव ईश्वर पोखरेलले मन्त्रालय बाँडफाँटमा दुई शीर्ष नेताबीच मोटामोटी सहमति भएको र अन्तिम निर्णय हुन बाँकी रहेको प्रतिक्रिया दिए । मन्त्रालय भागबण्डा टुंगिएसँगै एमाले र माओवादी नेताहरु मन्त्री छनोटको गृहकार्यमा जुटेका छन् ।
मन्त्री छान्न एमालेले शुक्रबार बिहान ९ बजे स्थायी समिति बैठक बोलाएको छ । बैठक प्रधानमन्त्री निवासमा बालुवाटारमा बस्ने एमालेले जनाएको छ । त्यस्तै माओवादी शीर्ष नेताहरुको बैठकले पनि आफ्नो भागमा परेका मन्त्रालय छिट्टै टुंग्याउने नेताहरुले बताएका छन् ।
संघीय समाजवादी फोरमलाई पनि सरकारमा सहभागि गराउन ओली र दाहालले पटक–पटक वार्ता गरेका छन् । तर, फोरमलाई सरकारमा सहभागि गराउने विषय भने अहिलेसम्म अनिश्चित नै छ ।