काठमाडौं, १० फागुन । सडक विस्तारको मारमा परेका काठमाडौं उपत्यकाका पीडितहरुले उचित क्षतिपूर्तिको व्यवस्था नगरे सरकारविरुद्ध कडा आन्दोलनमा जाने चेतावनी दिएका छन ।
सडक विस्तारपछि उचित क्षतिपूर्तिको व्यवस्था नगरिएको भन्दै पीडितहरुले बुधबार माईतीघर मण्डलामा उचित क्षतिपूर्तिको व्यवस्था गर्न माग गर्दै नयाँ सरकारलाई पनि दबाव दिन सुरु गरेका हुन । नयाँ सरकारले पनि आफूहरुको माग सम्बोधन नगरे कडा संघर्षमा जान बाध्य हुने चेतावनी दिइएको छ ।
उचित विकल्प तयार नभई सडक विस्तारको नाममा आफूहरुको बाससमेत उठाएको भन्दै पीडितहरुले विगत २ वर्षयता सरकार विरुद्ध संघर्ष गर्दै आएका छन । नगर विकास प्राधिकरणले कामै नगरेको भन्दै तत्काल खारेज गर्न पनि पीडितहरुको माग छ । दबाव अभियानमा सहभागी वृद्धवृद्धाहरुले आफूहरुलाई बुढेस्कालमा घरबारबिहिन बनाएकाले सरकारविरुद्ध संघर्ष गर्नु परेको बताएका छन । स्थानीय नेताहरुलेसमेत आफूहरुलाई दुःख दिने गरेको पीडितको गुनासो छ ।
पीडितहरुले संवैधानिक व्यवस्था अनुसार बास बस्न पाउने नागरिकको हक खोस्ने अधिकार कसैलाई पनि नरहेको भन्दै उचित क्षतिपूर्तिका व्यवस्था गर्न माग गर्दै आएका छन ।
