म्यानमारका राष्ट्रपति यू मिन आङ ह्लाइङले शुक्रवार म्यानमारको परम्परागत नयाँ वर्षको पहिलो दिनमा ४ हजार ५ सय भन्दा बढी कैदीहरूलाई आममाफी दिनुभएको छ । राज्य सञ्चालित म्यानमार रेडियो र टेलिभिजनकाअनुसार राष्ट्रपतिले दुईवटा छुट्टाछुट्टै आदेशमार्फत ४ हजार ३ सय ३५ म्यानमारका कैदीहरू र १ सय ७९ विदेशी कैदीहरूलाई आममाफी दिनुभएको हो । यो आममाफी म्यानमारको परम्परागत नयाँ वर्षको उत्सव मनाउन, जनतामा शान्ति र मानवता ल्याउन र रिहा भएका व्यक्तिहरूलाई राष्ट्र निर्माणमा सहभागी हुन सक्षम बनाउनका लागि दिइएको बताइएको छ ।
आदेशमा भनिएको छ कि यदि आममाफी पाएका कुनैपनि व्यक्तिले पुनः अपराध गरेमा, उनीहरूले नयाँ सजायका साथै अघिल्लो सजायको बाँकी भाग पनि भुक्तान गर्नुपर्नेछ । यसैबीच, विदेशी कैदीहरूलाई माफी दिएर देश निकाला गरिएको छ । अर्को एक छुट्टाछुट्टै आदेशमा, राष्ट्रपतिले देशभरका जेलमा रहेका केही कैदीहरूको सजाय पनि कम गरेका छन् । जसमा मृत्युदण्डको सजायलाई जन्मकैदमा परिणत गर्ने, ४० वर्षभन्दा बढीको सजायलाई ४० वर्षमा झार्ने र ४० वर्ष वा सोभन्दा कमको सजायलाई छ भागको एक भागले घटाउने निर्णय गरिएको छ । गत वर्ष पनि म्यानमारको परम्परागत नयाँ वर्षको अवसरमा ४ हजार ९ सय भन्दा बढी कैदीहरूलाई आममाफी दिइएको थियो ।
