एजेन्सी । अफगानिस्तानका सरकारी अधिकारीहरूले दिएको जानकारीअनुसार भारी हिमपात र हिमआँधीका कारण देशका प्रमुख यातायात सञ्जालहरू विच्छेद भएका छन् । राजधानी काबुललाई नौवटा उत्तरी प्रान्तहरूसँग जोड्ने महत्वपूर्ण सालाङ राजमार्ग भीषण आँधी र बाक्लो कुहिरोका कारण शुक्रवार बिहानैदेखि पूर्ण रूपमा बन्द भएको छ ।
सार्वजनिक निर्माण मन्त्रालयका प्रवक्ता मोहम्मद अशरफ हकशिनासका अनुसार राजमार्गका कतिपय खण्डमा हिउँको थुप्रो २ देखि ४.६ मिटरसम्म पुगेको छ । यसैगरी, गज्नी प्रान्तमा सुरक्षा र सम्भावित दुर्घटनालाई ध्यानमा राख्दै काबुल–कान्दाहार राजमार्ग पनि अस्थायी रूपमा बन्द गरिएको छ ।
गज्नीका सूचना तथा संस्कृति निर्देशक हमिदुल्लाह निसारले सामाजिक सञ्जालमार्फत उक्त अवरोधको पुष्टि गरेका छन् । यो मौसमी प्रणालीले अफगानिस्तानका ३४ मध्ये ३३ प्रान्तलाई प्रभावित पारेको छ भने कतिपय स्थानमा तापक्रम माइनस १५ डिग्री सेल्सियससम्म झरेको छ ।
