फागुन २४ शनिबार ।
सोलुखुम्बुमा परम्परागत रूपमा उब्जनी हुँदै आएका गहुँ, जौ, फापरजस्ता अन्नबाली लगाउन कठिन हुँदै गएको छ । पहिला–पहिला उवा, फापर प्रशस्त फल्ने गरेकोमा अहिले खेतीयोग्य जमिन बाँझै छोड्नुपर्ने अवस्था आएको किसानले बताएका छन् ।खेती लगाए पनि गतिलो उब्जनी नहुँदा खेती लगाउनै छोडेको खुम्बुको छुकुमका तेन्जिङ जाङ्बु शेर्पाले बताए।
परम्परागत कृषि बालीको उत्पादन हुन छोडेसँगै खुम्बु क्षेत्रका नागरिकमा खाद्य सुरक्षा चिन्ताको विषय बनेको छ ।पोषण अभावले बालबालिका, महिला तथा गर्भवतीको स्वास्थ्य झन् कमजोर बन्ने जोखिम रहेको स्थानीय स्वास्थ्यकर्मी ङिमडोमा शेर्पा बताउछन । वातावरणविद् डा राजन थापाका अनुसार समयमा हिमपात नहुँदा जमिन सुक्खा हुँदै गएका छन्, पानीको अभाव बढ्दो छ ।
यसलाई मौसमी चक्र गडबडका रूपमा लिन सकिने उनको भनाइ छ ।खेती भएन भनेर खेतबारी बाँझो छोड्ने क्रम बढ्नु थप चिन्ताको विषय रहेको कृषि विज्ञले बताएका छन् । साना किसानलाई जलवायु अनुकूल खेती अभ्यास, सिँचाइका लागि वैकल्पिक उपाय तथा जैविक कृषिलाई प्रवर्द्धन गर्ने नीति आवश्यक रहेको कृषि विज्ञ चन्द्रमान श्रेष्ठले बताएका छन ।
