फुञ्जो झङ्मु लामाले १५ घण्टाभन्दा कम समयमै विश्वको सर्वोच्च शिखर सगरमाथा चढेर महिला आरोहीको कीर्तिमान
राख्नु भएको छ ।
१४ घण्टा ३१ मिनेटमा सगरमाथा चढेर फुञ्जोले कीर्तिमान राख्नु भएको हो । यसअघि सन् २०१८ मा फुञ्जोले नै ३९ घण्टा ६ मिनेटमा सगरमाथाको शिखरमा पुगेर बनाएको रेकर्ड सन् २०२१ मा हङकङकी स्याङ यिन हङले २५ घण्टा ५० मिनेटबाट भंग गर्नु भएको थियो ।
फुञ्जोले यसपटक त्यो कीर्तिमान तोड्नु भएको हो । यसअघि दोलखाका पेम्बादोर्जे शेर्पाले आठ घण्टा १० मिनेटमा सगरमाथा आरोहण गरेर सबैभन्दा छिटो सगरमाथा आरोहण गर्ने पुरुषको रूपमा गिनिजबुकमा रेकर्ड लेखाइसक्नु भएको छ ।
२०४३ मा गोरखाको छेकम्पार बुर्जी गाउँ (चुम भ्याली) मा सामान्य परिवारमा जन्मेकी फुञ्जोको सानै उमेरदेखि हिमाल आरोहणमा रुचि थियो ।
अमेरिकाको ‘डेनाली’ हिमाल आरोहण गरेर आरोहण यात्रा प्रारम्भ गरेकी फुञ्जोले चोयु, अमाडब्लम, लापुछे, मनास्लुजस्ता हिमाल चढिसक्नु भएको छ ।
उहाँँले फ्रान्सको ‘मोमलङ’ हिमाल पनि आरोहण गरिसक्नु भएको छ । फुञ्जोको यो साहसिक कार्यले संसारभर नेपालको साहसिक पर्यटन प्रवर्द्धमा सन्देश दिनुका साथै विश्वशान्ति, जलवायु परिवर्तन, पर्यटन प्रवर्द्धमा लाग्ने आरोहीको प्रोत्साहनमा पनि भूमिका खेल्ने विश्वास गरिएको छ ।
फुञ्जोले हिमाल आरोहणका क्रममा दुर्घटनामा परेकालाई हेलिकप्टरमा झुण्डिएर उद्धार गर्ने काम गर्दै आउनु भएको छ । पहिलो नेपाली महिला हेलिकप्टर लामोलाइन उद्धारकर्ता फुञ्जो यसअघि नै तेन्जिङ–हिलारी पुरस्कारबाट सम्मानित भइसक्नु भएको छ । ०००
