काठमाडौं,१५ चैत्र । माध्यमिक शिक्षा परीक्षा एसइर्ई आजबाट सुरु भएको छ । २७ गतेसम्म हुने एसइर्ई परीक्षा शान्तिपूर्णरुपमा सम्पन्न गर्न र भयरहित भएर ढुक्कसँग परीक्षामा सहभागी हुन राष्ट्रिय परीक्षा बोर्डले सबैलाई आह्वान गरेको छ ।
हरेकदिन बिहान ८ बजे देखि ११ बजेसम्म परिक्षा हुने छ । परीक्षामा सामुदायिक तथा संस्थागत गरी १० हजार आठ सय छ विद्यालयका दुई लाख ५० हजार सात सय ७२ छात्रा, दुई लाख ५३ हजार छ सय २७ छात्र र अन्य १५ जना गरी कूल पाँच लाख चार हजार चार सय १४ परीक्षार्थी छन् । परीक्षाका लागि दुई हजार ६४ परीक्षा केन्द्र निर्धारण गरिएको छ । सबैभन्दा कम मनाङ, मुस्ताङमा एक÷एक र सबैभन्दा बढी काठमाडौँमा एक सय २७ परीक्षा केन्द्र छन् ।
यस वर्षको एसइई परीक्षामा जापानबाट १५ छात्रा र ८ छात्र गरी २३ जना सहभागी हुने राष्ट्रिय परीक्षा बोर्डले जानकारी दिएको छ । परिक्षामा उतीर्ण हुन ३५ प्रतिशत अंक ल्याउनुपर्ने छ । कम अङ्क ल्याएमा कक्षा ११ मा भर्ना हुन नपाउने र पुनः मौका परीक्षामा सहभागी हुनुपर्ने व्यवस्था गरिएको छ । ३५ अङ्क ल्याउन नसक्ने विद्यार्थीले पहिलो वर्ष दुई विषयको मौका परीक्षा दिन पाउने व्यवस्था गरिएको छ । विद्यार्थीले तीन पटकसम्म दुई विषयमा ग्रेड वृद्धि परीक्षामा सहभागी हुन पाउने छन् ।
