एजेन्सी, १२ माघ । बार्सिलोना कोपा डेल रे कपको सेमिफाइनलमा प्रवेश गरेको छ ।
आफ्नै शहरको प्रतिद्वन्द्वी स्पान्योललाई समग्रमा २–१ ले पराजित गरी बार्सिलोनाले अन्तिम चारको यात्रा पक्का पारेको हो । सेमिफाइनलको यात्रा तय गर्ने क्रममा बार्सिलोनाले स्पान्योलविरुद्धको दोस्रो लेगमा २–० को जित दर्ता गर्यो।
बार्सिलोनाको जितमा लियोनेल मेसी र लुइस स्वारेजले १/१ गोल गरे । मेसी र स्वारेज दुवैले पहिलो हाफमा गोल गरेका हुन् । बार्सिलोना पहिलो लेगमा १–० ले पराजित भएको थियो । गएराति भएको खेलमा फिलिप काउटिन्होले बार्सिलोनामा डेब्यु गरेका छन् ।
काउटिन्हो खेलको ६८ औं मिनेटमा कप्तान आन्द्रे इनेष्टाको स्थानमा मैदान प्रवेश गरेका हुन् । लिभरपुलबाट यसै सिजन १ सय ४२ मिलियन पाउण्डमा बार्सिलोना स्थानान्तरण भएका काउटिन्हो तिघ्राको चोटका कारण मैदान वाहिर थिए ।
