बालकुमारी घटनाका दोषीलाई फौजदारी अभियोजन दर्ता गर्न नागरिक समाजको माग

काठमाडौं, १४ पुस ||
सचेत नागरिक समाजले ललितपुरको बालकुमारीमा बिहीवार भएको घटनाबारे आपत्ति जनाउँदै सरकारको बिरोध गरेको छ । शनिवार काठमाडौंमा पत्रकार सम्मेलन गर्दै उनीहरुले आफ्ना नागरिकको रक्षा गर्ने दायित्व बोकेको राज्यले निहत्था नागरिकको हत्या गर्न नमिल्ने बताएका हुन् । उनीहरुले दुवै पक्षबाट गोली चलेको भए राज्य संयन्त्रलाई गोली चलाउन छुट रहेपनि निहत्था नागरिकमाथि सरकारले कुन आधारमा गोली चलाएको हो भन्नेकुराको छानबिन हुनुपर्ने बताए । पत्रकार सम्मेलनमा बोल्दै वरिष्ठ अधिवक्ता दिनेश त्रिपाठीले आफ्ना नागरिकको रक्षा गर्ने दायित्व बोकेको राज्यले निहत्था नागरिकमाथि गोली प्रहार गरी हत्या गर्नु लोकतन्त्रको सबैभन्दा खराब पक्ष रहेको जिकिर गर्नुभयो । उहााले राज्य नै अपराधी भएको जिकिर गर्नुभयो । उहाँले निहत्था नागरिकको हत्या गर्नेहरुलाई कारबाही हुनैपर्ने बताउनु भयो । बालकुमारी घटनाको निष्पक्ष छानबिन हुनुपर्ने र फौजदारी अभियोजन दर्ता गर्नुपर्ने बताउनु भयो ।
उहाँले जनता मार्ने अधिकार सरकारलाई नरहेको बताउनु भयो । बिहीवार ललितपुरको बालकुमारीमा इपिएस परीक्षा दिन पाउनुपर्ने मागसहित केही विद्यार्थीहरुले आन्दोलन गरेका थिए । आन्दोलनका क्रममा दुई जना युवाको ज्यान गएको थियो । परीक्षा दिन पाउनुपर्ने माग राखि आन्दोलनमा उत्रिएका युवाहरुमाथि प्रहरीको गोली र लाठि चार्ज हुँदा दुई युवकहरुको ज्यान गएपछि यतिबेला सरकारको चर्को आलोचना भइरहेको छ ।