काठमाडौै, कार्तिक १९ वाणिज्य तथा विकास बैंकहरुको कमजोर प्रथम त्रैमासिक वित्तीय रिपोर्ट सार्वजनिक भएपछि ओर्लिरहेको सेयर बजारलाई झनै तल झारेको छ ।
शुक्रबार मात्रै पहिलो त्रैमासको वित्तीय विवरण सार्वजनिक गरेका वाणिज्य बैंकहरुको औसत नाफा २८ प्रतिशतले घटेको छ भने समयमै उठ्न नसकेको (निष्क्रिय) कर्जा दोब्बर भएको छ ।
बैंकहरुले ठूलो रकम कर्जा नोक्सानी प्रोभिजन गर्नुपरेपछि सेयर लगानीकर्ता सशंकित बनेका छन् । आइतबार खुलेको बजारमा लगानीकर्ता बैंकहरुको सेयर बेच्नतिर हतारिए, जसको परिणामस्वरुप नेप्से परिसूचक वर्षको न्यून विन्दु नजिक झरेर अन्त्यमा केही सुधार भएको छ ।
आइतबार नेप्से परिसूचक २१.४६ अंक घटेर १८ सय २६ विन्दुमा कायम भएको छ । यो विन्दु एक वर्षको न्यूनतम नजिकको हो । यस दिन कुल ३५ कम्पनीको मूल्य बढ्दा १ सय ९७ को घट्यो भने ४ को स्थिर रह्यो ।
९७ करोड २३ लाख रुपैयाँ बराबरको धितोपत्र कारोबार भएको छ । आइतबार होटल तथा पर्यटन क्षेत्रको सूचक भने १८ अंक बढ्यो । अरु सबै क्षेत्रका सूचक घटेका बेला सो क्षेत्रमा भने लगानीकर्ताको आकर्षण देखियो ।
विशेषतः अक्टोबर महिनामा सबैभन्दा धेरै विदेशी पर्यटक नेपाल आएको तथ्यांकले गर्दा होटल क्षेत्रमा आकर्षण देखिएको हो । होटलबाहेक आइतबार सबै क्षेत्रका उपसूचक झरेका छन् ।
