काठमाडौं, २२ असार । कोशी प्रदेशका नवनियुक्त मुख्यमन्त्री उद्धप थापाले आज पद तथा गोपनियताको शपथ लिदैंछन् । नेपाली कांग्रेस संसदीय दलका नेता समेत रहेका थापाले प्रदेश प्रमुख समक्ष पद तथा गोपनियताको शपथ लिने भएका छन् । उनले ३/४ सदस्यीय मन्त्रीमण्डल बनाएर शपथ लिने तयारी गरेका छन् ।
नवनियुक्त मुख्यमन्त्री थापाले तीनजना मन्त्री थपेर शपथ लिने तयारी गरेका छन् । । आज विस्तार हुने मन्त्रिपरिषद्मा माओवादी केन्द्रबाट जीवन आचार्य, नेकपा एसबाट कमल जवेगु र नेपाली कांग्रेसबाट प्रदीप सुनुवार मन्त्री बन्ने बुझिएको छ ।
थापा मुख्यमन्त्रीमा बिहीबार नियुक्त भएका हन् । बिहीबार प्रदेश प्रमुख परशुराम खापुङले मुख्यमन्त्रीमा नियुक्त गरेका हुन् ।
थापाले प्रदेश सभामुखलाई माओवादीको सांसदमै गणना गरी गठबन्धनको तर्फबाट मुख्यमन्त्रीमा दाबी पेस गरेका थिए । कांग्रेस, माओवादी केन्द्र, नेकपा एस र जसपा संसदीय दलका नेताको हस्ताक्षरसहित थापाले संविधानको धारा १६८ (२) बमोजिम मुख्यमन्त्रीको लागी दाबी पेस गरेका हुन् ।
गठबन्धनमा कांग्रेस (२९), माओवादी केन्द्र (१३, सभामुखसहित), नेकपा एकीकृत समाजवादी ४ र जनता समाजवादी पार्टी १ गरी ४७ सिट छ । तर, सभामुख जोडेर बहुमत पु¥याउन नहुने एमालेले बताउँदै आएको छ ।
