काठमाडौं । नवनिर्वाचित राष्ट्रपति रामचन्द्र पौडेलको तस्बिरलाई ‘इडिट’ गरेर गालाको कोठी नै गायब भएको तस्विर राष्ट्रपति कार्यालयको वेबसाइटमा राखिएपछि यसबारे निकै चर्चा भएको थियो ।
फोटोग्राफर र यसका जानकारहरुले फोटोग्राफिको सामान्य ज्ञान नभएकाले मात्र यस्तो काम गर्ने भन्दै आलोचना पनि गरे ।
यसबारे सामाजिक सञ्जालमा समेत निकै टिकाटिप्पणी भएपछि तीन दिनअघि राखिएको उक्त तस्विर राष्ट्रपति कार्यालयको वेबसाइटबाट हटाइएको छ । राष्ट्रपति पौडेलको गालाको कोठी देखिएको तस्विरलाई वेबसाइटमा राखिएको हो ।
यसअघिको तस्बिरमा पौडेलको दुवै गालामा रहेका कोठी हटाइनुका साथै चाउरी परेको गालालाई पनि सम्पादन गरेर चिल्लो पारिएको थियो ।
उक्त तस्विरमा पौडेलका आँखा वास्तविकभन्दा ठूला र धेरै गोरो देखाइएको थियो ।
