स्वस्थानी व्रत आजदेखि सुरु शालीनदीमा विशेष मेला | ईमाउण्टेन समाचार

Our Network

माघ १४ २०७९, शनिबार

स्वस्थानी व्रत आजदेखि सुरु शालीनदीमा विशेष मेला

swasthani-brata-1

काठमाडौं,१७ पुस । एक महिनासम्म मनाइने स्वस्थानी व्रत आज सुरु, काठमाडौंको शालीनदीमा भोलिदेखि विशेष मेला ।

पौष शुक्ल पूर्णिमादेखि माघ शुक्ल पूर्णिमासम्म विधिपूर्वक गरिने स्वस्थानी व्रत आज शुरु भएको छ ।
स्वस्थानी व्रत अन्र्तगत बिहान माघ स्नान गरी मध्याह्नकालमा महादेवको पूजा गरिन्छ । बेलुकी स्कन्द पुराणको केदार खण्डअन्तर्गत माघ माहात्म्यको कुमार अगस्त्यबीच संवाद भएको स्वस्थानी व्रत कथा सुन्ने सुनाउने परम्परा छ ।

एक महिनासम्म यो विधिबाट व्रत गरी माघ शुक्ल पूर्णिमाका दिन १०८ जनै, १०८ सुपारी, १०८ पान, १०८ फूल, १०८ रोटी, १०८ अक्षता विभिन्न थरीका फलफूल, धूप, बत्ती, नैवेद्य, श्रीखण्ड, रक्तचन्दन, सिन्दूर, वस्त्र, भेटी चढाई व्रतको कामना पूर्ण होस् भनी भगवतीलाई अघ्र्य दिइन्छ । चढाइएका प्रसादमध्ये सबैबाट आठ÷आठ पतिलाई, पति नभए छोरालाई र छोरा पनि नभए मीत छोरालाई एवम् मीत छोरा पनि नभएमा कामना सिद्ध होस् भनी नजिकको पवित्र नदीमा लगी बहाउन चलन छ । आफू बसेकी स्थानकी देवीको पूजा गर्नु नै स्वस्थानी पूजा हो ।

देवीको विधिपूर्वक व्रत गरेमा विछोड भएका जोडीको पुनः मिलन हुन्छ भन्ने विश्वास छ । रोग–ब्याध लागेको भए ठीक हुने र पति वा पत्नीका रुपमा कसैलाई इच्छाएको भए प्राप्त हुने कथासमेत प्रचलित छ । सत्ययुगमा हिमालय पर्वतकी पुत्री पार्वतीले महादेवलाई पति पाऊँ भनी विष्णुको निर्देशानुसार स्वस्थानीको व्रत गरेको कथा स्वस्थानीमा वर्णन गरिएको छ । व्रतपछि विछोडमा परेका नाग–नागिनीको समेत पुनः मिलन भएको कथामा उल्लेख छ ।

स्वास्थानी ब्रत सुरु भएसँगै काठमाडौंको साँखुस्थित शालिनदीमा माघस्नानसहित माधवनारायणको मेला लाग्दै छ । शालिनदी सुधार समितिले भोलि सुरु हुने मेलामा २५ लाख दर्शनार्थीले सहजरुपमा दर्शन गर्न सक्ने व्यवस्था मिलाइएको बताएको छ ।