काठमाडौं, २३ मंसिर । नेकपा माओवादी केन्द्रको पदाधिकारी बैठक समानुपातिक सांसदको अन्तिम सूची नटुंग्याएरै सकिएको छ । बैठक भोलि फेरि बस्नेगरी सकिएको हो ।
पार्टी केन्द्रीय कार्यालय पेरिसडाँडामा बसेको पदाधिकारी बैठक समानुपातिक सूचीका विषयमा पुनः छलफल गर्ने गरी सकिएको बताइएको छ ।
माओवादीले समानुपातिकतर्फ १४ सिट पाएको छ । माओवादीले त्यसमध्येमा १२ जना महिला पठाउनै पर्ने भएको छ । यसरी हेर्दा माओवादीमा समानुपातिकमा २ जना पुरुषले मात्र स्थिान पाउने भएका छन् ।
दुई पुरुष मध्य आजको बैठकमा एक जनाको नाममा भने सहमति जुटेको बुझिएको छ । आजको बैठकमा हितराज पाण्डेको नाममा सहमति जुटेको हो ।
संसदलाई समावेशी बनाउनुपर्ने कारण र प्रत्यक्षमा माओवादी नेतृहरुको हार भएपछि समानुपातिकको सूचीमा रहेका पुरुषहरु न्यून मात्रामा अट्ने भएका हुन् । यसले माओवादीका पुरुषहरुमा विवाद देखिएको छ ।
समानुपातिक सूचीका विषयमा सरोकारवाला निकाय र कानुन विद्हरुसँग छलफल गरेर भोलि टुंगो लगाइने सचिव लीलामणि पोखरेलले जानकारी दिएका छन् ।
