सिन्धुली । सिन्धुलीको शीतलपाटी गाविसको त्रिवेणीमा सडक भासिँदा बिपी राजमार्ग अवरुद्ध भएको छ ।
आइतबार राति एक्कासी पहिरोले सडक भासिएको हो । झण्डै डेढसय फिट बाटो भासिएकाले सडक खुलाउन समस्या भएको छ ।
काठमाडौंबाट इन्जिनियरको टोली हिँडेको र सर्वेक्षण गरेपछि मात्रै सडक मर्मत गरिने डिभिजन सडक कार्यालय खुर्कोटका डिभिजनल इञ्जिनियर राजेश महर्जनले जानकारी दिनुभयो ।
तल सुनकोशी नदी भएकाले डाईभर्सन गर्ने ठाउँ समेत नभएको जिल्ला प्रहरी कार्यालय सिन्धुलीका प्रहरी निरीक्षक उत्तमप्रसाद बरालले बताउनुभयो ।
सडक भासिएपछि रामेछाप, खोटाङ, ओखलढुंगा, सोलुखुम्बु, सिन्धुली सहित पूर्व जाने यात्रुलाई समस्या भएको छ ।
बाटो छोटो भएकाले पूर्व चल्ने साना गाडी यही सडकबाट चल्ने गरेका थिए । जापान सरकारले बनाएको बीपी राजमार्गमा दुई वर्षअघिदेखि गाडी चल्न थालेको हो ।
