जुम्ला । जुम्लामा पुरुषको तुलनामा महिलामा आँखाको समस्या बढी रहेको पाइएको छ । जुम्लामा हिमालयन आँखा अस्पताल खोखराको प्राविधिक सहयोग, सिविएम नेपाल र नेपाल नेत्रज्योति संघको आर्थिक सहयोगमा सञ्चालन गरिएको ३८औं शिविरमा यस्तो समस्या देखिएको हो ।
उक्तशिविरमा आँखाको मोतीबिन्दु सम्बन्धी चेकजाँच गर्नका लागी १३ सय ६० जनाले आएका थिए । जसमध्ये १ सय २१ जनाको शल्यक्रिया गरिएको हिमालयन आँखा अस्पतालका नेत्र अधिकृत गोविन्दनाथ योगीले बताए ।
उनले भने, ‘यो शिविर जेष्ठनागरिकलाई लक्षित गरी राखिएको हो । उनका अनुसार पुरुषको तुलनामा आँखाको समस्या महिलामा बढी रहेको छ । यस पटकको शल्यक्रियाको तथ्याङ्कमा ५९ जना पुरुष रहेका छन् भने ६२ जना महिला रहेका छन् ।’
नेत्र अधिकृत गोविन्दनाथ योगीले विभिन्न अध्ययनपत्रले महिलामा आँखा सम्बन्धी समस्या बढी हुने गरेको पाइएको बताए । प्रमुख जिल्ला अधिकारी विजया कुमारी प्रसाईंले आँखाको स्वास्थ्य सेवा सबै क्षेत्रमा पहुँच बढाउन पहल भएको बताइन् । उनले जुम्लाका सबै पालिकामा आँखा सम्बन्धीको उपचार जरुरी रहेको बताइन् ।
