रुपन्देही सुपरलिग : बुटवल-११ विजयी, बुद्ध सुपर फोरमा प्रवेश  | ईमाउण्टेन समाचार

Our Network

असार १७ २०७९, शुक्रबार

रुपन्देही सुपरलिग : बुटवल-११ विजयी, बुद्ध सुपर फोरमा प्रवेश 

भैरहवा । नेपाल टेलिकम रुपन्देही सुपरलिग ए डिभिजनअन्तर्गतको बुधबारको खेल बुटवल ११ ले जितेको छ । तिलोत्तमा क्रिकेट क्लबलाई ५६ रनले पराजित गर्दै बुटवल ११ ले जित निकालेको हो ।

भैरहवाको सिद्धार्थ रंगशालामा रुपन्देही क्रिकेट संघको आयोजनामा जारी खेलमा टस जितेर सुरुवाती ब्याटिङ रोजेको बुटवल-११ ले निर्धारित ५० ओभरको खेल मध्ये ३९ दशमलव २ ओभरमा सबै विकेट गुमाउँदै १५६ रन बनाएको थियो । जसका लागि सर्वाधिक विवश खातीले ४३, विवेक शर्माले २७ तथा ईशान पाण्डे र अभिषेक ठाकुरले २६-२६ रनको योगदान गरे । बलिङतर्फ तिलोत्तमाका अमरसिंह रौटेला र कृष्ण पराजुलीले ३-३ र कृष्ण कार्कीले २ विकेट लिए ।

१५७ रनको लक्ष्य पाएको तिलोत्तमाले जवाफी ब्याटिङमा ३७ ओभरमा सबै विकेट गुमाउँदै लक्ष्य पार गर्न सकेन । १०० रनमै समेटिएपछि हार बेहोरेको तिलोत्तमाका लागि कृष्ण भुसालले २३, भुवन गैरेले २० र अमरसिंह रौतेलले १४ रन बनाए । 

तिलोत्तमालाई सस्तैमा समेट्न बुटवल–११ का सुभम घमालले ४, सोनु तामाङले ३ र ईशान पाण्डेले २ विकेट लिए । बुधबारको खेलमा शुभम् घमाल म्यान म्यान अफ द म्याचबाट पुरस्कृत भए ।

मंगलबार हुने भनिएको खेलमा टिम सहभागी नभएकोले बुद्ध क्रिकेट क्लब सुपर प्रवेश गरेको छ, बुद्ध नेट रन रेटको आधारमा अघिल्लो चरणमा प्रवेश गरेको संघका सचिव सञ्जय गुरुङले जानकारी दिए । 

बिहीबार डिभिजन ए अन्तर्गतको अन्तिम खेल वेश्टर्न क्रिकेट क्लब र शंकरनगर क्रिकेट क्लबबीच हुन संघले जानकारी दिएको छ । 

नेपालकै एक मात्र सुपरलिग प्रतियोगिता २०५४ साल देखि निरन्तर हुँदै आएको छ । जिल्ला भित्रका २० टिम मध्ये १२ टिमबीच लिगमा प्रतिस्पर्धा गराइँदै छ । लिगमा टप हुने ४ टिमबीच चैत ५ गतेबाट सुपर फोरमा प्रतिस्पर्धा गर्नेछन् । 

प्रतियोगिताको विजेताले ८० हजार, उपविजेताले ४० हजार नगद सहित ट्रफी, मेडल र प्रमाण पत्र प्राप्त गर्नेछन् । यस्तै, म्यान अफ द सिरिजलाई १५ हजार, वेस्ट ब्याट्सम्यान, वेस्ट बलर र उदयीमान खेलाडीलाई जनही ५/५ हजार रुपैयाँ प्रदान गरिने संघका कार्यवाहक अध्यक्ष धिरज क्षेत्रीले बताए । प्रत्येक दिनको म्यान अफ द म्याचलाई १ हजार २ सय रुपैयाँ प्रदान गरिँदै आएको छ ।

Leave a Reply