गुल्मी । मुसीकोट नगरपालिकाले विपन्न परिवारलाई बस्ती निर्माण गरी स्थानान्तरण प्रक्रिया सुरु गरेको छ । मुसिकोट नगरपालिका–५ आँपचौरका १२ घर विपन्न दलित परिवारको पहिलो चरणमा घर निर्माण र स्थानान्तरण थालिएको हो । यसका लागि नगरपालिकाले छैटौँ नगरसभाले जोखिमयुक्त बस्ती स्थानान्तरण तथा पुर्नस्थापना विद्येयक पारित गरेको थियो ।
भौगोलिक रुपमा छरिएर रहेका बस्तीहरुलाई एकीकृत गर्ने उदेश्य रहेको नगरप्रमुख सोमनाथ सापकोटाले बताए । बस्ती एकीकृत हँुदा पुर्वाधारको सुविधा, आय–आर्जजमार्फत गरिबी निवारण, स्वास्थ्य, शिक्षाको पहँुच सँगै रोजगारी सृजना गर्न सकिने सापकोटाको भनाइ छ । पहाडी जिल्लाहरूमा धेरै बस्ती छरिएर रहेकाले विकास पुर्वाधारका संरचनामा ठुलो बजेट खर्च हुने गरेको छ । जसका कारण आर्थिक सामाजिक विकासमा पछाडी पर्दै आएको छ । सोही अवस्थालाई मध्येनजर गर्दै बस्ती स्थान्तरणलाई जोड दिएको नगरप्रमुख सापकोटाले बताए ।
मुसीकोट नगरपालिका–५ आँपचौरको हात्तीगौडा भौगोलिक रुपमा अति विकट छ । यो ठाउँ चन्द्रकोट गाउँपालिका र मुसिकोट नगरपालिकाको बिचमा पर्छ । यहाँ १२ घर विपन्न दलित परिवार बसोबास गर्दै आएका छन् । उनीहरूको लागि हात्तीगौडा बास बस्ने स्थान मात्रै थियो । विद्यालय, स्वास्थ्य संस्था र यातायातको पहुँच थिएन । काम गर्न विहान गाउँ छोडेपछि साँझ मात्रै फर्किन्छन् । ‘पुर्खा नै हात्तीगौडा बसे । हाम्रो पनि गाउँ छोडेर बसाई सर्ने उपाय भएन,’ मुसिकोट नगरपालिका–५ हात्तीगौडाका प्रकाश सामतले भने,‘ नगरले ठुलो गुन लगाएको छ ।’
अहिले मुसीकोट नगरपालिका–५ आँपचौरको देउरालीमा घर निर्माण भइरहेको छ । दसैंसम्म १२ घर परिवारनै नयाँ घरमा बस्ने योजनामा थिए । तर लामो समयसम्म पानी परेकाले समयमै काम सम्पन्न भएन ।’ अहिले ६ घर निर्माण भइरहेका छन् । ती मध्ये दुई परिवारले पुरै काम सकेको मुसिकोट नगरपालिका–५ का वडाध्यक्ष भागिरथ खरेलले बताए । उनले स्थानीय तहको निर्वाचनमा बोलेका मध्येका बस्ती स्थानान्तरणको काम पनि पुरा गर्न सकेकोमा खुसी व्यक्त गरे ।
नगरले प्रति रोपनी डेढ लाखका दरले स्थानीयको जग्गा खरिद गरेको छ । घरगोठ, शौचालय र सानो करेसाबारी समेत हरेक परिवारलाई डेढदेखि दुई रोपनी जग्गा प्रदान गरेको छ । नगरपालिकाले नै घर छाउनको लागि जस्तापाता उपलब्ध गराएको छ भने काठ र ढुंगा बोक्न ट्याक्टर दिएको खरेलले जानकारी दिए । मुसीकोट नगरपालिकाले शिक्षा, स्वास्थ्य, पुर्वाधार र कृषि पर्यटनमा उल्लेख्नीय काम गरिरहेको छ । साना भन्दा दीर्घकालिन र ठुला प्रभाव पार्ने योजनाहरू नगरभित्र सन्चालनमा छन् ।
