ताप्लेजुङ, १५ कार्तिक। नेकपा एमालेका वरिष्ठ नेता एवम् पार्टीका सचिव योगेश भट्टराईले अबको सरकार वामपन्थी शक्तिले चलाउने दावी गरेका छन्।
ताप्लेजुङमा आयोजित कार्यक्रममा बोल्दै भट्टराईले देशभर चलिरहेको वाम गठबन्धनको चुनावी लहर र एकताको कारण आगामी प्रदेशसभा र प्रतिनिधि सभा चुनावका लागि मात्रै नभई अबको पचास वर्षसम्म वामपन्थी पार्टीले सत्ता चलाउने दावी गरेका हुन्।
अधिकांश समय कांग्रेसले सत्ता समाले पनि देशमा आर्थिक र सामाजिक क्रान्ति गर्न नसकेको कारण राष्ट्रको विकास र समृद्धीका लागि पनि कम्यूनिष्टहरुको एकता भएको उनले बताएका छन्।
विकासको सुरुवात चुनावी एकता पछि प्रतिनिधिसभा र प्रदेश सभाको चुनावमा एमाले र माओवादी केन्द्रका सबै केन्द्रिय नेता जिल्ला जिल्लाबाट उठ्ने र केन्द्रिय पहुँचको आधारमा आफ्नै ठाउँबाट विकास सुरु गर्ने लक्ष्य बमोजिम आफ्नो उम्मेदवारी गृह जिल्ला ताप्लेजुङबाट दिएको समेत भट्टराईले स्पष्ट पारे ।
ताप्लेजुङलाई अब देशकै नमुना जिल्ला हुने गरि विकास र समृद्धिको आकार तर्फ ढाल्ने उनको विश्वास छ।
