गृहमन्त्री खाँणले भने, 'बाढीले प्रभावित व्यास गाउँपालिकामा खाद्यान्न र औषधिको अभाव हुन दिदैनौं' | ईमाउण्टेन समाचार

Our Network

माघ २४ २०७९, मंगलबार

गृहमन्त्री खाँणले भने, ‘बाढीले प्रभावित व्यास गाउँपालिकामा खाद्यान्न र औषधिको अभाव हुन दिदैनौं’

काठमाडौं । गृहमन्त्री बालकृष्ण खाँणले दार्चुलाको व्यास गाउँपालिकामा सरकारले खाद्यान्न र औषधिको अभाव हुन नदिने बताएका छन् ।

बिहीबार सिंहदरवारमा बसेको राज्य व्यवस्था तथा सुशासन समितिको बैठकमा गृहमन्त्री खाँणले महाकाली नदीमा आएको बाढीले उत्पन्न भएको व्यास क्षेत्रको खाद्यान्न र औषधिको प्रवन्ध र पूर्व तयारी सरकारले गरिसकेको बताएका हुन् । उनले गत साउन १५ गते तुइन तर्ने क्रममा महाकाली नदीमा खसेर बेपत्ता भएका दार्चुलाका जयसिंह धामीको सत्यतथ्य जानकारीका लागि गठित समितिले काम गरिरहेको बताए ।

गृहमन्त्री खाँणले निर्मला पन्तको बलात्कारपछि हत्या प्रकरण अझै छानबिनकै क्रममा रहेको र यसमा लामो समय लागिसकेकोले चाँडै सत्यतथ्य पत्ता लगाएर अपराधीलाई कठघरामा उभ्याउने बताए । उनले चाडबाडमा बजारमा गुणस्तरहीन वस्तुहरु भेटिने समस्या र कालोबजारीलाई गम्भीरतापूर्वक लिएर सरकार अघि बढ्ने आश्वासन दिए ।

गृहमन्त्री खाँणले भने, “दार्चुलाको व्यास गाउँपालिकामा खाद्यान्नको अभाव भनेर जनप्रतिनिधिहरुले भन्नुभएको छ, त्यसको लागि खाद्यान्न र आवश्यक औषधिको व्यवस्था सरकारले गरिसकेको छ, नेपालबाटै हिँडेर त्यहाँ पुग्नु पर्ने समस्याले केही ढिला भइसकेको छ तर सरकारले आवश्यक सामग्रीको प्रवन्ध र पूर्वतयारी गरिसकेको छ, त्यस्तै निर्मला पन्तको बलात्कारपछि हत्या प्रकरण छानबिनकै क्रममा छ, र यो लामो समय भइसक्यो, यो घटनाको छानबिन गर्न सकिन्छ र दोषिलाई कानूनि दायरामा ल्याएर कारबाही गर्न सकिन्छ भन्ने विश्वास छ ।”

बैठकमा प्रहरी महानिरिक्षक शैलेश थापा क्षेत्रीले नेपाल प्रहरीले वैशाख १ गतेदेखि भदौ ९ गतेसम्मको अवधिमा कालोबजारी गर्ने ५६ जनालाई पक्राउ गरेको बताए । उनले ३६ वटा कालोबजारीका घटनामा २० वटा मुद्दा दर्ता भएको समेत जानकारी गराए । उनले नेपाल पुलिसले कालोबजारीका घटनालाई गम्भीरताका साथ लिएको समेत बताए ।

महानिरिक्षक क्षेत्रीले नेपाल पुलिलसले अहिले ३ वर्षको अवधिमा विभिन्न अपराधका घटनाहरुको संकलित कागजात, बयान, सबुतलाई केन्द्रीय स्तरमा लगेर रिभ्यू गरिरहेको पनि जानकारी दिए ।

बैठकमा उपस्थित सांसदहरु डा. डिला संग्रौला, लालबाबु पण्डित, दिलेन्द्रप्रसाद बडू, प्रेम सुवाल लगायतका सांसदहरु जयसिंह धामी, निर्मला पन्त र बजारको कालोबजारी लगायतका समसामयिक विषयमा आफ्नो धारणा राखेका थिए ।

Leave a Reply