दाङ। दाङमा दोस्रो चरणको कोरोना महामारीमा जिल्लाका १० स्थानियतह मध्य तुलसीपुर उपमहानगरपालिकामा बढि संक्रमित भएका छन् ।
शुक्रबारसम्म उपमहानगरपालिकामा १ हजार २ सय २७ जना ( ७०१ पुरुष र ५२६ महिला) सक्रिय संक्रमितहरु रहेका छन् । बैशाख १ गतेदेखि हाल सम्म २४ जनाको मृत्यु भइसकेको तुलसीपुर उपमहानगरपालिकाका कोभिड १९ फोकल पर्सन विमल केसीले जानकारी दिए ।
केसीका अनुसार उपमहानगरपालिकामा सबै भन्दा बढी ३१ देखि ४० बर्ष सम्मका व्यक्तिमा कोरोना पुष्टि भएको छ । जसमा ६ सय २० जनामा कोरोना पुष्टि भएको छ । त्यसैगरी ५ देखि १० बर्ष सम्मका ३६ जना, ११ देखि २० बर्ष सम्मका १ सय ४९ जना, २१ देखि ३० सम्म ५६३ जना, ४१ देखि ५० सम्म ३ सय ८ जना रहेका छन् ।त्यस्तै ५१ देखि ६० सम्म १ सय ५, ६१ देखि ७० सम्म ११५, ७१ देखि ८० सम्म ३५ र ८० देखि माथि उमेरका ६ मा पुष्टि भएको केसीले बताए ।
उपमहानगरपालिकामा हाल सम्म संक्रमितको संख्या २ हजार १ सय ८७ जना रहेको छ,भने निको हुनेको संख्या ९ सय ३८ पुगेको छ । हाल सम्म उपमहानगरका विभिन्न वडाका ४२ जनाको मृत्यु भएको छ ।
त्यसैगरी कोरोना विशेष अस्पताल बेलुझण्डी दाङमा थप एक कोरोना संक्रमितको मृत्यु भएको छ । मृत्यु हुनेमा तुसलीपुर उपमहानगरपालिका ५ का ६७ वर्षीय पुरुष रहेको अस्पतालले जनाएको छ । उनको शनिबार बिहान १ ः ३० बजे अस्पतालमा मृत्यु भएको अस्पतालका व्यवस्थापक दोर्ण वलीले जानकारी दिए ।
उनी अस्पतालमा यहि बैशाख २० गते एचडीयूमा भर्ना भएका थिए । उनलाई कोरोना संक्रमण संगै निमोनिया भएको अस्पतालले जनाएको छ ।
