ललितपुर । ललितपुरको जावलाखेलस्थित अल्का अस्पतालले कोरोना संक्रमित बिरामीको उपचारका लागि अक्सिजन उपलब्ध गराउन आग्रह गरेको छ । अल्का अस्पतालले आज एक विज्ञप्ती जारी गर्दै अस्पतालमा कोरोना संक्रमित बिरामीको उपचारका लागि सहज रुपमा अक्सिजन उपलब्ध गराउने वातावरण बनाईदिन स्वास्थ्य तथा जनसंख्या मन्त्रालय, बागमती प्रदेश सरकार, स्थानीय प्रशासनलगायतलाई आग्रग गरेको छ ।
अस्पतालमा संक्रमितहरुको उपचारमा समस्या देखिन सुरु भएको अस्पतालले विज्ञप्तीमा उल्लेख गरेको छ । अस्पतालमा बिरामीहरुको चाप बढ्दै गई रहेको र अक्सिजन आपूर्तिमा समस्या थपिएको अस्पतालले बताएको छ ।
हाल अस्पताललाई दैनिक एक सय ५० वटा सिलिण्डर आवश्यक पर्नेमा ४६ वटा भने अस्पताल आफैले आन्तरिक रुपबाट व्यवस्था गर्दै आएको विज्ञप्तीमा उल्लेख छ । बिरामीको उपचारका लागि आवश्यक अपर्याप्त अक्सिजन उपलब्ध गराई दिन अस्पतालले आग्रह गरेको हो ।
