काठमाडौं । जल तथा मौसम पूर्वानुमान महाशाखाका अनुसार बिहीबार देशका पहाडी लगायत अधिकांस भूभागमा मौसम आंशिकदेखि सामान्य बदली रहने छ ।
हाल देशमा स्थानीय वायुको साथै पश्चिमी न्युनचापीय रेखाको समेत प्रभाव रहेको छ ।
अहिले देशका पहाडी भूभागमा आंशिक देखि सामान्य बदली रही बाँकी भूभागमा समेत आंशिक बदलीको अवस्था रहेको छ ।
आज दिउँसो देशको पहाडी भूभागलगायत अन्य भुभागमा पनि मौसम आंशिकदेखि सामान्य बदली रहने महाशाखाले जनाएको छ । देशका पहाडी भूभागका केही स्थानहरुमा मेघगर्जन र चट्याङसहित क्षणिक वर्षाको सम्भावना रहेको छ ।
आज राति भने देशका पहाडी भूभागमा मौसम आंशिकदेखि सामान्य बदली रहेपनि बाँकी भूभागमा मौसम सामान्यतया सफा रहने छ । आज राति पनि देशका पहाडी भूभागका केही स्थानमा मेघगर्जन र चट्याङसहित क्षणिक वर्षाको सम्भावना रहेको छ ।
देशका पहाडी भूभागका केही स्थानमा अपरान्ह साँझतिर मेघगर्जन र चट्याङसहित क्षणिक वर्षाको सम्भावना रहेकोले आवश्यक सतर्कता अपनाउन महाशाखाले आग्रह गरेको छ ।
