प्रकाश नेपाल
पाल्पा, २० चैत । डिभिजन सडक कार्यालय पाल्पाले सडक सीमा अतिक्रमण गरी बनाएका स्थायी तथा अस्थायी संरचनाहरु भत्काउन सुरु गरेको छ । पटक पटक सार्वजनिक सूचना जारी गर्दा समेत स्वयम घरधनीहरुले भौतिक संरचना नहटाएपछी सडक कार्यालयले डोजरको प्रयोग गरी स्थायी तथा अस्थायी भौतिक संरचना हटाउन थालेको हो ।
सडक कार्यालयले पहिलो चरणमा सडक ऐन २०३१ अनुसार सडक सिमा अतिक्रमण गरिएका अस्थायी तथा स्थायी भौतिक संरचना हटाउने सार्वजनिक सूचना जारी गर्यो, दोस्रो चरणमा सडक सिमा भित्र अतिक्रम भएका संरचना आफै हटाउन ७ दिने सार्वजनिक सूचना जारी गर्यो, तेस्रो पटक घरधनी स्वयमले सडक सीमा भित्र बनाएका संरचना नहटाए कार्यालयले आफै भत्काउने सो संरचना भत्काउने र क्षतीपुर्ति भराउने सार्वजनिक सूचना जारी गरेको थियो ।
सोही अनुसार कसैले पनि अतिक्रम गरेका भौतिक संरचना आफै नहटाएपछी कार्यालयले डोजर लगाएर संरचना भत्काउन सुरु गरेको हो ।
डिभिजन कार्यालयले विगतमा कार्यालय संचालन गरेको आफ्नै भवन भत्काएर अतिक्रमित संरचना भत्काएको हो । पहिलो दिन कार्यालयले बरतुङ्ग देखी राईडाडा सम्मका भौतिक संरचना हटाएको छ ।
डिभिजन सडक कार्यालयले सिद्धार्थ राजमार्गको पाल्पा चिडियाखोला देखी राम्दी सम्म सडक सिमा अतिक्रमण गरी बनाएका ७ सय घरमा हटाउने गरी रातो चिन्ह लगाएको थियो ।
पहिलो चरणमा सिद्धार्थ राजमार्गको राम्दी देखी चिडियाखोला सम्मका अतिक्रमित भौतिक संरचना हटाउने र दोस्रो चरणामा तानसेन तम्घास सडक खण्डका अतिक्रमित हटाउने डिभिजन सडक कार्यालयका ईन्जिनियर राम पियारी चौधरीले बताए ।
सिद्धार्थ राजमार्गको बुटवल देखी पोखरा सम्म दुई लेनको पुर्ण डेडिकेटेट सडक निर्माण गर्ने डिपिआर तयार भएकोले सोही अनुसार अतिक्रमित सडक क्षेत्र खाली गर्न डिभिजन सडक कार्यालय सक्रिय भएर लागेको छ ।
