श्याम गुप्ता
बारा, ७ चैत । बाराको जीतपुरसिमरा उपमहानगरपालिका वडा नं.५ बकुलिया स्थित मकै बारीमा करेन्ट लागेर एक जना युवकको मृत्यु भएको छ । स्थानीय जयनारायण चौधरीका ३० वर्षीय छोरा उपदेश चौधरीको करेन्ट लागेर घटनास्थलमै मृत्यु भएको हो ।
बिहान करिब साँढे ६ बजेको समयमा शौच गर्नका लागि स्थानीय दिपनारायण चौधरीको मकैको खेतमा प्रवेश गर्ने क्रममा करेन्ट लागेको थियो । दिपनारायणले खेत नजिकै रहेको उनको आफ्नै घरबाट जीआई तारले खेतमा घेराबन्दी गरेर करेन्ट प्रवाह गरेका थिए ।
मकै बालीमा जंङ्गली तथा घर पालुवा जनावर पस्ने गरेकोमा बाली सुरक्षा गर्ने उद्देश्यले जीआई तारले मकै बारी घेरेको दिपनारायणका परिवार जनले जनाएका छन् ।
यता करेन्ट लागेर मृत्यु भएको देखेर वडा नं.५ का वडाध्यक्ष मोहित चौधरीले प्रहरीमा खबर गरेका थिए । नियम वीपरित दिपनारायणले खेतमा तारबार गरेर करेन्ट प्रवाह गरेको र सो बिषयमा आफूलाई केही जानकारी नभएको वडाध्यक्ष चौधरीले बताए ।
यता गैर कानुनी रूपमा खेतमा तारबार गरेर करेन्ट प्रवाह गरेको आभियोगमा दिपनारायण चौधरीलाई आवश्यक कारावाहीका लागि प्रहरीको नियन्त्रणमा राखिएको ईलाका प्रहरी कार्यालय सिमराले जनाएको छ ।