काठमाडौं, १५ कात्तिक । नेपाली काँगे्रसका केन्द्रिय सदस्य डाक्टर शेखर कोइरालाले दुई तिहाई बहुमत प्राप्त बर्तमान सरकार असफल भइसकेको दावी गरेका छन् ।
नेपाल प्रेस युनियन उदयपुरले बिहीबार गाईघाटमा आयोजना गरेको पत्रकार सम्मेलनमा केन्द्रिय सदस्य कोइरालाले यस्तो बताएका हुन् । उनले प्राकृतिक स्रोत व्यवस्थापन, बित्त आयोग, अन्तरप्रदेश परिषद निर्माण, प्रदेशस्तरीय प्रहरी लगायतका काम सरकारले गर्न नसक्दा संघियता नै असफल हुने अबस्था आउन लागेको बताए ।
केन्द्रिय सदस्य कोइरालाले चरम गुटबन्दीमा फसेका कारण कांग्रेस गत आम निर्वाचनमा पराजय भोग्नुको साथै संवादहिनता, गुटबन्दी मौलाएको समेत बताएका छन् । उनले काँग्रेसमा नेतृत्व परिवर्तन नगरी कांग्रेस नसुध्रिन भन्दै २०७६ साल फाल्गुण महिना भित्र कुनै पनि हालतमा महाधिवेशन गर्न जरुरी रहेको बताए । कोइराला केही महिनायता जिल्ला दौडाहामा व्यस्त भएका छन् ।
