अप्सरा लामिछाने
काठमाडौं, १९ चैत । यातायात व्यवसाय क्षेत्रमा देखिएको सिण्डिकेट तोड्ने सरकारको प्रयासलाई व्यवसायीले चुनौति दिँदै आएका छन् । खुला बजार प्रतिष्पर्धाको मान्यतालाई चुनौति दिँदै व्यवसायी सिण्डिकेटको पक्षमा उभिँदा सर्वसाधारण भने सस्तो मूल्यमा गुणस्तरिय सुविधा लिनबाट बञ्चित भएका छन् ।
यातायात क्षेत्रमा व्याप्त सिण्डिकेट काठमाडौं–बनेपा रुटमा मयूर यातायातलाई रुट इजाजत दिएसँगै सतहमा आएको छ । नयाँ बस थपिएसँगै यस रुटमा बस सञ्चालन गर्दै आएका व्यवसायी विरोधमा उत्रिएका छन् ।
सरकारले मयुर यातायत प्रालीलाई रुट इजाजत दिएपछि कोटेश्वर पूर्वका १३ वटा समितिले अरनिको राजमार्गमा गाडी गुडाउन बन्द गरी आन्दोलनमा उत्रिएका हुन् ।
कोटेश्वर पूर्व यातायात समन्वय समितिले स्थानीय व्यवसायीसँग समन्वय नगरी नयाँ कम्पनीलाई रुट इजाजत दिएको दाबी गरको छ । तर, मयूर यातायातका पदाधिकारी भने खुला प्रतिष्पर्धाको मान्यता विपरित पुराना व्यवसायीले दादागिरी देखाएको बताउँछन् ।
पुराना व्यवसायीको सिण्डिकेटमा यातायात व्यवसायी महासंघले पनि साथ दिएको छ । यातायात व्यवस्था विभागले भने तत्काल अवरोध हटाउन चेतावनी दिएको छ । विभागले रुट इजाजत यातायात व्यवसायी महासंघको सिफारिसमा नभई विभागमा पञ्जिकरणका आधारमा दिने प्रष्ट पारेको छ ।
जतिसुकै आन्दोलन गरे पनि मयुर यातायात प्रालिलाई दिएको रुट इजाजत खारेज नहुने विभागको भनाइ छ । अझ विभागले आन्दोलन फिर्ता नलिए आन्दोलनमा उत्रने व्यवसायीहरुको नै रुट इजाजत खारेज गर्ने चेतावनी दिएको छ ।
आन्दोलनरत व्यवसायीले भने यातायात सञ्चालन अनुमती दिने निकायले अध्ययन नै नगरी नयाँ कम्पनीलाई अनुमति दिएको आरोप लगाएको छ ।
आफूहरुले सिण्डिकेट प्रणालीबाट नभई आलोपालो प्रणालीबाट बस सञ्चालन गरेको उनीहरुको भनाइ छ । आधा शताब्दी देखि सेवा सञ्चालन गरिरहेका व्यवसायीसँग समन्य नै नगरी विभागले मनलागि रुट इजाजत दिएको उनीहरुको आरोप छ ।
