काठमाडौं
सिक्दै कमाउदै कार्यक्रमअन्तर्गत कृषिसम्बन्धी अध्ययनका लागि इजरायल गएका कञ्चनपुरका विपिन जोशी हमासको कब्जामा परेको २ बर्षपछि उनको शवमात्रै नेपाल फर्किने भएको छ । विपिन जीवितै रहेको आशामा उनकी आमा र बहिनी इजरायल लगायतका अन्य शक्तिराष्ट्रहरु सम्म नै पुगेर विपिनको रिहाईको लागि पहल गरिरहेका थिए । यसबीचमा नेपाली युवा विपिन जोशीको झण्डै दुई वर्ष अघि नै हत्या भएको पाइएको छ ।
इजरायली सैनिक अस्पतालमा गरिएको डीएनए परीक्षणको रिपोर्टमा उनको सन् २०२३ को अन्त्यतिर नै मृत्यु भइसकेको देखिएको बताइएको छ । हमासले हस्तान्तरण गरेको शव विपिन जोशीकै भएको डीएनए परीक्षणबाट पुष्टि भएको र प्राकृतिक मृत्यु नभइ हत्या नै भएको रिपोर्टबाट देखिएको बताइएको छ । सन् २०२३ को अक्टोवर ७ मा हमासले इजरायलको किबुजमा आक्रमण गर्दा १० जना नेपाली विद्यार्थी सहित १ हजार २ सय बढी मानिस मारिएका थिए ।
यस्तै २५१ जना बन्धक समेत बनाइएका थिए । जसमा कञ्चनपुरका विपिन जोशी समेत परे । पटकपटक हुने गरेका युद्धविराम सम्झौताअनुसार हमासले लगातार बन्धकको रिहाइसँगै केही शव समेतफिर्ता गरेपनि सरकारको कुटनीतिक कमजोरीका कारण विपिनको रिहाई हुन सकेन् ।
सरकारको असक्षमताकै कारण विपिन जोशीकी बहिनी र आमा सात समुन्द्र पारीको विरानो मुलुकमा पुग्नुपरेको भन्दै तत्कालीन समयमा सरकारको विरोध भएको थियो । सरकारले वेलैमा पहल गर्न सकेको भए २ बर्ष सम्म धेरै बन्धकहरु रिहाई भैसक्दा पनि विपिनको पालो कहिल्यै नआएको भन्दै नेपाल कुटनितिक मामिलामा निरिह देखिएको स्पष्ट भएको छ ।
