टीका खतिवडा ||
इलाम, ८ माघ ||
इलाममा जारी प्रथम एनआरएनए इलाम गोल्डकपमा न्युरोड टीम (एनआरटी) सेमीफाइनलमा प्रवेश गरेको छ । सोमबार भएको तेस्रो क्वार्टरफाइलन खेलमा बाग्मती युवा क्लब सर्लाहीलाई टाइब्रेकमार ४–३ गोल अन्तरले पाखा लगाउँदै एनआरटीले सेमीफाइनलको यात्रा पक्का गरेको हो ।
निर्धारित सयम (९० मिनेट) र अतिरिक्त (१५ मिनेट) को समयमा समेत दुवै टिमबाट गोल हुन नसकेपछि टाइब्रेकरमा नतिजा लिइएको थियो । सनम लिम्बू, सरोज तामाङ, सुमित श्रेष्ठ र जय गुरुङले एनआरटीका तर्फबाट गोल गरे ।
उता बाग्मतीका कप्तान दावा गुरुङको प्रहार एनआरटीका गोलकिपर य्भेस प्रिसोले उत्कृष्ट बचाउ गरे । निर्मल घिसिङको प्रहार गोल पोस्ट माथीबाट गयो । आयुस राना मगर, बिमल घिसिङ र अभिषेक महतोको प्रहारले जाली चुमाएपनि जितका लागि पर्याप्त थिएन ।
जितसँगै एनआरटीले बुधबार हुने पहिलो सेमीफाइनलमा आयोजक रेडहर्ष फुटबल क्लब इलामसँगको भेट पक्का गरेको छ । रेडहर्षले पाहुना टोली मानेभञ्ज्याङ फुटबल क्लब दार्जिलिङ भारतलाई ४–० ले रोक्दै सेमीफाइनलको यात्रा तय गरेको थियो ।
खेलको म्यान अफ द म्याच उपविजेता बाग्मतीका आयुस राना मगर घोषित हुँदै नगद रु पाँच हजार प्राप्त गरे ।
मङ्गलबार अन्तिम क्वार्टरफाइनलमा पाँचथर फुटबल क्लब र लुम्बिनी फुटबल क्लब बुटवलबीच प्रतिष्पर्धा हुने आयोजक रेडहर्ष फुटबलक क्लबका सचिव प्रकाश घिमिरेले जानकारी दिए । रेडहर्ष फुटबल क्बल इलामको आयोजनामा जारी गोल्डकपमा भारतको एक टिमसहित ८ टिमले सहभागीता जनाएका छन् ।
