काठमाडौं, १८ माघ । शहीद स्मारक ए डिभिजन लिगअन्तर्गत दशौं चरणका खेल आजबाट सुरु हुँदैछन् । त्रिपुरेश्वरस्थित दशरथ रंगशालामा हुने पहिलो खेल १२ बजे हुनेछ भने दोस्रो खेल ३ बजे हुनेछ ।
आजको पहिलो खेलमा सर्वा्धिक रुचाइएको क्लब थ्रीस्टार र रेलिगेशन जोनबाट बाहिर निस्कन नसकेको सरस्वती युथ क्लब भिड्दै छन् । अंक तालिकाको पाँचौ स्थानमा रहेको थ्रीस्टार आजको खेलमा जित निकाल्दै एक स्थान सुधार गर्ने दाउमा हुने छ भने सरस्वती उसलाई रोक्ने दाउमा मैदान उत्रने छ ।
आजै ३ बजे हुने दोस्रो खेलमा सशस्त्र प्रहरीको एपीएफले हेविवेट मछिन्द्रको सामना गर्ने छ । अंक तालिकामा १९ अंकका साथ दोस्रो स्थानमा रहेको मछिन्द्रले शीर्षस्थानको आर्मीलाई पछ्याइरहेको छ। आर्मीको २० अंक छ।
आजको खेलमा मछिन्द्रले जित निकालेमा उ शीर्ष स्थानमा उक्लने छ । यता मछिन्द्रसँग प्रतिस्पर्धामा आउने एपीएफ रेलिगेशन जोनमा रहेको सरस्वतीसँग अंकदुरी बढाउने दाउमा हुने छ ।
