काठमाडौं, १ कात्तिक । विराटनगर टाईटन्सले महिला फ्रेन्चाईज क्रिकेट लिग वुमेन च्याम्पियन्स लिग डब्लुसीएलमा लगातार दोस्रो जित निकालेको छ । शुक्रबार भएको खेलमा पोखरा पल्टनलाई ६ विकेटले हराउँदै विराटनगरले लगातार दोस्रो जित निकालेको हो ।
किर्तिपुरस्थित त्रिभुवन विश्वविद्यालयको क्रिकेट मैदानमा पोखराले दिएको ९५ रनको सामान्य लक्ष्य विराटनगरले १५ ओभरमा मात्र ४ विकेट गुमाएर पुरा गर्यो । विराटनगरको जितमा लक्ष्मी चौधरीले २३ तथा ज्योति पाण्डेले २२ रन जोडिन भने अश्मिना कर्माचार्यले अविजित १६ र डोली भट्टले १२ रन जोडिन् ।
त्यस अघि टस जितेर पहिले ब्याटिङ गरेको पोखराले २० ओभरमा ५ विकेट गुमाएर ९४ रन बनाएको थियो । जितसँगै विराटनगरले २ खेलमा ४ अंक जोडेको छ ।
शीर्ष स्थानको विराटनगरले पहिलो खेलमा ललितपुर फाल्कोन्सलाई ४ विकेटले हराएको थियो । पोखराको भने यो लगातार दोस्रो हार हो । पहिलो खेलमा पोखरा क्याट क्विन्स काठमाडौंसँग ८२ रनले पराजित भएको थियो ।
