- कामीरिताले यसअघिको आफनै किर्तिमान तोडे
- आगामी वर्ष २५औँ पटक सगरमाथा आरोहण गरेर सन्यास लिने
काठमाडौं, ७ जेठ । कामीरिता शेर्पाले सगरमाथाको २४औँ पटक सफल आरोहण गरी विश्व कीर्तिमान कायम गरेका छन् । शेर्पाले यसअघिको आफ्नै २३ औँ पटकको सगरमाथा आरोहणको कीर्तिमान तोड्दै नयाँ कीर्तिमान बनाएका हुन्।
उनले मंगलवार बिहान सगरमाथाको २४औँ पटक आरोहण गरेको पर्यटन विभागले पुष्टि गरेको छ । यसअघि आरोही शेर्पाले जेठ १ गते सगरमाथाको २३औँ पटक आरोहण गरेका थिए। उनी सात दिनको अवधिमै पुनः सगरमाथाको आरोहण गर्न सफल भएका हुन्।
यस वर्षको वसन्त ऋतुको सगरमाथा आरोहण गत वैशाख ३१ गते शुरु भएको थियो । सोलुखुम्बुको थामेगाउँमा जन्मेका ४९ वर्षीय शेर्पाले आगामी वर्ष २५औँ पटक सगरमाथा आरोहण गरेर सन्यास लिने यसअघि नै बताइसकेका छन् ।
