काठमाडौं, ९ बैशाख । प्रतिनिधिसभाका सांसद एवम् पूर्वमन्त्री हृदयश त्रिपाठीले उखु किसानलाई तत्काल अनुदान सहायता उपलब्ध गराउन सरकारसँग माग गरेका छन् ।
सोमबार काठमाडौंमा आयोजित साक्षात्कार कार्यक्रममा बोल्दै सांसद त्रिपाठीले उखु उद्योगीहरुका कारण अरबौंको घाटा व्यहोर्न बाध्य उखु किसानहरुका लागि सरकारले ७० प्रतिशत र उखु उद्योगीहरुले ३० प्रतिशत अनुदान सहायता तत्काल उपलब्ध गराउनुपर्ने बताए ।
उखु उद्योग बन्द भएका कारण सर्लाहीमा मात्रै करिव ३ अरवको उखु खेतमै नष्ट हुने अवस्थामा रहँदा पनि सरकारले उनीहरुलाई राहत दिन उचित कदम चाल्न नसकेको सांसद त्रिपाठीको गुनासो छ ।
सांसद त्रिपाठीले उखु उद्योगीहरुले फेरी पनि चिनीको मूल्य वृद्धि गर्न खोजिरहेको उल्लेख गर्दैै सचेत रहन पनि सरकारलाई सचेत गराए । उनले उखु किसानलाई मारमा पार्ने उखु उद्योगीहरुको गतिविधिप्रति सरकार गम्भिर बन्न नसकेको आरोप लगाए ।
फरक प्रसंगमा सांसद त्रिपाठीले सरकारको एक वर्षे कार्यकाललाई निराशाजनक भन्न नमिल्ने टिप्पणी गरे । सरकारले अव भने प्राथमिकता निर्धारण गरेर आफ्नो कामलाई अघि बढाउनुपर्ने उनको सुझाव छ ।
