चितवन, २८ चैत । नेकपाका अध्यक्ष पुष्पकमल दाहाल प्रचण्डले विदेशमा रहेको नेपालीलाई नेपालमा फर्कने वातावरण सरकारले बनाइरहेको बताएका छन् । बिहीवार चितवनको भरतपुर महानगरपालिकामा बनेको जेम्स वल्र्ड फन पार्कको उद्घाटन कार्यक्रममा बोल्दै अध्यक्ष दाहालले समृद्धिको लागि सरकारले उत्पादन बृद्धि र रोजगारीको सिर्जना गर्ने काम गरिरहेको उल्लेख गरे ।
उहाँले ब्यक्ति धनी भएर देशको चिनारी नवन्ने भन्दै राष्ट्र धनी भएपछि नागरिकको पहिचान पनि बन्ने बताए । दाहालले राष्ट्रलाई धनी र समृद्ध बनाउने दिशातिर सवै लाग्नुपर्ने भन्दै विदेशमा रहेका नेपालीले पनि नेपाल धनी होस र नेपालमा नै फर्किएर काम गर्न पाइयोस भन्ने चाहेकाले सरकार त्यही अनुसार अघि बढिरहेको उल्लेख गरे । उनले नेपालमा भएको परिवर्तन राजनीतिक सहमतिले मात्र सम्भव भएको स्पष्ट पारे ।
कार्यक्रममा नेपाली कांग्रेसका महामन्त्री डाक्टर शशांक कोइरालाले मुलुक अप्ठ्यारो अवस्थामा रहेको भन्दै विपक्षीहरुलाई पनि सँगसँगै समृद्धितर्फको यात्रामा लैजान दाहालसंग आग्रह गरे । महामन्त्री कोइरालाले नेपाली कांग्रेसले सकारात्मक प्रतिपक्षको भूमिका खेल्न चाहेको भन्दै कांग्रेसलाई साथ लिएर गए मुलुकमा समृद्धि आउने बताए ।
